मनोरुग्णाकडून साधूचा खून

जयसिंगपूर

भिक्षुकी करणाऱ्या साधूच डोक्यात सिमेंटच्या पोलचे घाव घालून निर्घृण खून झाला. शिरोळ येथील कल्लेश्वर मंदिराच्या आवारात मंगळवारी पहाटे पाच वाजण्याच्या सुमारास खुनाची ही घटना घडली. गुरुनाथ आप्पासाहेब लकरने (वय ६५, रा. कराड, जि. सातारा) असे मृताचे नाव आहे. संशयित महादेव ऊर्फ नामदेव बाबूराव पाटील (वय २५, रा. शिनाल, ता. अथणी, जि. बेळगाव) याला पोलिसांनी अटक केली आहे. तो मनोरुग्ण असल्याचे सांगण्यात आले. खुनानंतर त्याने केलेल्या दुसऱ्या हल्ल्यात नृसिंहवाडी येथील दीपक चव्हाण हे गंभीर जखमी झाले आहेत.

याबाबत पोलिसांतून मिळालेली अधिक माहिती अशी, की गुरुनाथ लकरने मूळचे सातारा जिल्ह्यातील कराडचे आहेत. शिरोळ येथे दिवसभर भिक्षा मागून ते रात्री कल्लेश्वर मंदिराच्या आवारात मुक्काम करीत असत. सोमवारी रात्री अकरा वाजण्याच्या सुमारास ते नेहमीप्रमाणे कल्लेश्वर मंदिर परिसरात झोपले होते. मंगळवारी पहाटे पाच वाजण्याच्या सुमारास संशयित आरोपी महादेव ऊर्फ नामदेव पाटील याने सिमेंटच्या पोलने गुरुनाथ यांच्या डोक्यात घाव घातले. या हल्ल्यात त्यांचा जागीच मृत्यू झाला.

या हल्ल्यानंतर संशयित आरोपी महादेव पाटील हा सिमेंटच्या पोलसह नृसिंहवाडीच्या दिशेने जात होता. याचवेळी नृसिंहवाडी येथील दीपक चव्हाण हे फिरण्यासाठी शिरोळच्या दिशेने येत होते. आरोपीच्या हातातील पोल पाहून ते स्वसंरक्षणासाठी बाजूला होत असतानाच त्यांच्यावरही संशयिताने हल्ला केला. या हल्ल्यात त्यांच्या उजव्या हातास गंभीर दुखापत झाली. त्यांना उपचारासाठी खासगी रुग्णालयात दाखल करण्यात आले.

दरम्यान, याबाबत माहिती मिळताच शिरोळचे पोलिस निरीक्षक उदय डुबल, सहायक पोलिस निरीक्षक समीर गायकवाड यांनी फौजफाट्यासह घटनास्थळी धाव घेतली. खून आणि खुनी हल्ल्यानंतर उसाच शेतात पळून जाण्याचा प्रयत्न करणाऱ्या संशयिताला नागरिकांनी व पोलिसांनी पकडले. संशयित महादेव पाटील हा शिरोळ येथील आपल्या नातेवाईकांकडे सोमवारी सायंकाळी आला होता. नातेवाईकांकडून मिळालेल्या माहितीनुसार तो मनोरुग्ण असून गेली नऊ वर्षे रत्नागिरी, सांगली, बेळगाव, हुबळी या ठिकाणी उपचार केल्याचे समजले. यापूर्वी संशयिताने अथणी येथील पोलिस ठाण्याच्या एका कर्मचार्यावर तसेच वडील बाबूराव पाटील यांच्यावरही त्याने खुनी हल्ला केल्याची चर्चा होती.

...........

चौकट

नातेवाईकांच्या शोधाचे आव्हान

शिरोळ येथील खुनाच्या घटनेनंतर पोलिसांना मृताजवळ ज्येष्ठ नागरिकांना देण्यात येणारे तहसिलदारांचे ओळखपत्र आढळले. यावर मृताचे नाव गुरूनाथ आप्पासो लकरने ता.कराड, जि.सातारा असा पत्ताही आहे. यावरून पोलिसांनी कराड येथे मृताच्या नातेवाईकांचा शोध घेण्याचा प्रयत्न केला. मात्र हे ओळखपत्रच बोगस असल्याचे स्पष्ट झाले. यामुळे आता मृताच्या नातेवाईकांचा शोध घेण्याचे पोलिसांसमोर आव्हान आहे.