राष्ट्रवादी काँग्रेसच्या नेत्याचा खून, पलूस तालुक्यातील घटना

सांगली: पलूस तालुक्यातील खटाव गावचे माजी सरपंच आणि राष्ट्रवादीचे नेते आनंदराव धोंडीराम पाटील (वय ५३) यांचा धारदार शस्त्राने खून करण्यात आल्याची घटना रविवारी घडली. दिवसा-ढवळ्या आणि भर रस्त्यावर दूचाकीवरुन निघालेल्या राजकीय व्यक्तीचा खून करुन हल्ले खोर पसार झाल्याने खळबळ माजली आहे. या खूनाचे नेमके कारण समोर आले नसून सुपारी देवून सराईतांच्या हातून पाटील यांचा खून करण्यात आला असावा, असा प्राथमिक अंदाज व्यक्त केला जात आहे. पाटील हे उपमु‘यमंत्री अजित पवार यांचे स्वीय सहाय्यक आणि अप्पर जिल्हाधिकारी गजानन पाटील यांचे थोरले बंधू होत.

पलूस - भिलवडी रस्त्यावर आनंदराव पाटील यांचे शेत आहे. त्या शेतात ते दररोज सकाळी फेरफटका मारत असत. त्याप्रमाणेच रविवारी सकाळी शेतावर गेले होते. द्राक्षबागेची पाहणी करुन साडे आकरा वाजण्याच्या सुमारास ते आपल्या दूचाकीवरुन घराकडे परतत होते. शेतातला रस्ता असल्याने मोबाईलवर बोलतच ते दूचाकीवरुन निघाले होते. त्याचवेळी पाठीमागून दूचाकीवरुन आलेल्या दोन हल्लेखोरांनी आनंदाराव पाटील यांच्या डोक्यावर धारदार सत्तूरने अचानक हल्ला केला. पुढे वळणदार असलेल्या टोकदार सत्तूरचे एका पाठोपाठ जोरदार वार झाल्याने पाटील दूचाकीवरुन कोसळले. तिसरा वार त्यांनी हातावर झेलण्याचा प्रयत्न केल्याने त्यांच्या हाताची बोटेही तुटली. अखेरच्या वार इतका जोरदार होता की, सत्तुर त्यांच्या डोक्यातच अडकला होता. तो सत्तूर तसाच सोडून हल्लेखोरांनी भिलवडीच्या दिशेने पलायन केले. या गुन्ह्याची नोंद भिलवडी पोलीसांत झाली आहे.

दिवसा-ढवळ्या आणि भर रस्त्यावर आनंदराव यांच्यावर हल्ला होत असताना आजूबाजूच्या शेतात काम करणार्‍या अनेकांनी आरडाओरडा केला. काहींनी पाटील यांच्या दिशेने धाव घेतली. या गंभीर घटनेची माहिती गावात समजताच अनेकांनी धाव घेवून पाटील यांना तात्काळ सांगलीच्या सरकारी हॉस्पीटलमध्ये दाखल केले. कार्यकर्त्यांची गर्दी धावली. स्थानिक नेतेही सरकारी हॉस्पीटलमध्ये दाखल झाले. पोलीस अधिकार्‍यांसह महसूल विभागातील वरिष्ठ अधिकारीही हॉस्पीटलमध्ये आले होते. पाटील यांच्यावर अतिदक्षता विभागात उपचार सुरु होते. त्या विभागाच्या बाहेरही मोठी गर्दी झाली होती.

अखेरचा फोन मुलाला : पण बोलणे होऊ शकले नाही.
शेतातून घरी निघाल्यानंतर आनंदराव पाटील यांनी दूचाकीवर चालवितानाच मुलाला फोन लावला होता. परंतु मुलाने फोन घेऊन बाप-लेकात बोलणे सुरु होण्यापूर्वीच हल्लेखोरांनी पाटील यांच्यावर हल्ला चढविला होता, अशी माहिती स्थानिकांकडून मिळाली.
स्थानिकांकडे चौकशी.

आनंदराव पाटील यांच्यावर हल्ला होत असल्याचे निदर्शनास येताच आजूबाजूच्या शेतात काम करणार्‍या अनेकांनी आरडाओरडा केला. काहींनी घटनास्थळाच्या दिशेने धाव घेतली होती. अशा काहीजणांकडून घटनेची माहिती घेण्याचा प्रयत्न सुरु आहे. त्या सर्वांना भिलवडी पोलीस ठाण्यात बोलावून घेतले होते. हल्लेखोरांबाबत काही ठोस माहिती मिळवण्याचा प्रयत्न सुरु होता.
खूनाची माहिती मिळताच पोलीस यंत्रणा धावल्या. काहींनी सरकारी हॉस्पीटल गाठले तर काहींनी आजूबाजूच्या गर्दीतून माहिती काढण्याचा प्रयत्न केला. जिल्हा पोलीस अधीक्षक सुहेल शर्मा, अप्पर पोलीस अधीक्षक मनीषा दुबुले यांनी घटनास्थळाची पाहणी करुन भिलवडी पोलीस ठाण्यात अधिकार्‍यांची बैठक घेतली. स्थानिक गुन्हे अन्वेषण शाखेचे पोलीस निरिक्षक श्रीकांत पिंगळे यांनीही काही पथके तयार करुन हल्लेखोरांचा शोध घेण्यासाठी रवाना केली आहेत. ठसेतज्ञांचे पथकही पोहचले होते. श्‍वान पथकाच्या माध्यमातून हल्लेखोरांचा मार्ग शोधण्याचा प्रयत्न झाला , परंतु श्‍वान घटनास्थळापासून काही अंतरापर्यंत जावून तेथेच घुटमळले. त्या परिसराला पोलीस छावणीचे स्वरुप आले होते.

या गुन्ह्याचा कसून तपास करावा : आमदार पृथ्वीराज देशमुखभाजपचे जिल्हाध्यक्ष आमदार पृथ्वीराज देशमुख यांनी सरकारी हॉस्पीटलमध्ये येऊन डॉक्टरांशी, पोलीस अधिकार्‍यांशी आणि आनंदाराव पाटील यांच्या नातेवाईकांची भेट घेतली. खटावचे माजी सरपंच म्हणून पाटील यांनी दिर्घकाळ काम केले आहे. त्यांनी आपली ताकद नेहमीच आमच्या पाठीशी ठेवली. त्यांच्या अशाप्रकारचा हल्ला कोणी आणि कोणत्या कारणासाठी केला. याचा कसून तपास झाला पाहिजे. दिवसा-ढवळ्या आणि रस्त्यावर जीवघेणा हल्ला केला जातोय. असे कृत्य सराईत गुन्हेगारच करु शकतात. त्यामुळे अशा गुन्हेगारांचा वापर करुन पाटील यांची हत्त्या करणार्‍यांचा चेहरा सर्वांसमोर आला पाहिजे, अशी मागणी देशमुख यांनी केली आहे.