कोल्हापूर: मुख्यमंत्री देवेंद्र फडणवीस यांच्या महाजनादेश यात्रेच्या पार्श्वभूमीवर राष्ट्रवादी युवक काँग्रेसने कोल्हापूर शहरात ठिकठिकाणी पोस्टर झळकावली आहेत. ‘मी पुन्हा येणार तुमच्या कोंबड्या चोरताना पाहायला’, ‘पक्षात येताय की ईडी पाठवू, ज्यांचे नाव घेऊन सत्तेत आले त्यांचेच किल्ले विकायला काढले, हे माझे सरकार’ या आशयाचे हे पोस्टर संपूर्ण शहरात चर्चेचा विषय ठरले आहेत.महाजनादेश यात्रेच्या निमित्ताने मुख्यमंत्री सोमवारी रात्री कोल्हापुरात दाखल झाले. रात्री उशिरा राष्ट्रवादीच्या कार्यकर्त्यांनी त्यांच्या विरोधात ही पोस्टरबाजी केली. या पोस्टरच्या माध्यमातून राष्ट्रवादीनं फसवी कर्जमाफी, कडकनाथ कोंबडी घोटाळ्याच्या मुद्द्यावरून मुख्यमंत्र्यांना लक्ष्य केले आहे. ‘जादूगार मोदी आले, जादूची कांडी फिरवली आणि सगळं बदलून गेलं’ अशी उपरोधिक टीकाही केली आहे. ‘मी पुन्हा येणार फसवी कर्जमाफी द्यायला, तुम्ही पुरात बुडा आम्ही सेल्फी घेणार’ या पोस्टरच्या माध्यमातून मंत्री गिरीश महाजन यांच्यावरही निशाणा साधला. सध्या कोल्हापूर आणि सांगली परिसरात कडकनाथ कोंबडी घोटाळा प्रकरण गाजत आहे. स्वाभिमानी शेतकरी संघटनेने या विषयावरून कृषि राज्यमंत्री सदाभाऊ खोत यांच्यावर टीकास्त्र सोडलं आहे. तसंच, त्यांच्या चौकशीची मागणी केली आहे. सोमवारी पलूस तालुक्यात स्वाभिमानीच्या कार्यकर्त्यांनी मुख्यमंत्र्यांच्या महाजनादेश यात्रेवर कोंबड्या फेकत निषेधही केला होता. मात्र भाजप सरकार त्यांना पाठीशी घालत असल्याचा आरोप होत आहे. सरकारच्या या धोरणावर टीका करताना ‘मी पुन्हा येणार तुमच्या कोंबड्या चोरताना पाहायला’ असे फलक लावले आहेत. मंगळवारी सकाळी हा प्रकार पोलीस प्रशासनाच्या निदर्शनास आला. महाजनादेश यात्रेच्या मार्गावरील हे सगळे पोस्टर पोलिसांनी यात्रेला प्रारंभ होण्यापूर्वीच हटविले.
कोल्हापुरात राष्ट्रवादीची मुख्यमंत्र्यांविरोधात पोस्टरबाजी
मुख्यमंत्री देवेंद्र फडणवीस यांच्या महाजनादेश यात्रेच्या पार्श्वभूमीवर राष्ट्रवादी युवक काँग्रेसने कोल्हापूर शहरात ठिकठिकाणी पोस्टर झळकावली आहेत. ‘मी पुन्हा येणार तुमच्या कोंबड्या चोरताना पाहायला’, ‘पक्षात येताय की ईडी पाठवू, ज्यांचे नाव घेऊन सत्तेत आले त्यांचेच किल्ले विकायला काढले, हे माझे सरकार’ या आशयाचे हे पोस्टर संपूर्ण शहरात चर्चेचा विषय ठरले आहेत.
महाराष्ट्र टाइम्स.कॉम 18 Sep 2019, 9:15 am