\B
प्रदेशाध्यांनी घेतल्या इच्छुकांच्या मुलाखती
\B
म. टा. प्रतिनिधी, कोल्हापूर
इच्छुकांची वाढती संख्या आणि प्रत्येकाचा शहराध्यक्षपदासाठी प्रबळ दावा यामुळे राष्ट्रवादी काँग्रेस शहराध्यक्ष निवडीवरुन निर्माण झालेला तिढा सोडविण्यासाठी पक्षाचे प्रदेशाध्यक्ष जयंत पाटील यांनी स्वत: पुढाकार घेतला. पाटील यांनी सोमवारी कोल्हापूर शहराच्या दौऱ्यावर येऊन पाचही इच्छुकांच्या स्वतंत्रपणे मुलाखती घेतल्या. तसेच पक्षाचे जिल्ह्याचे नेते व आमदार हसन मुश्रीफ आणि जिल्हाध्यक्ष ए. वाय. पाटील यांच्याशी चर्चा केली. पक्षाच्या नेत्यांशी चर्चा करुन येत्या काही दिवसात जिल्हाध्यक्ष आणि शहराध्यक्षपदाची निवडी जाहीर केल्या जातील, असे त्यांनी याप्रसंगी स्पष्ट केले. याप्रसंगी शहराध्यक्षपदासाठी पाचही इच्छुकांनी पुन्हा दावा केल्यामुळे पेच कायम राहिला आहे.
माजी महापौर आर. के. पोवार, स्थायी समितीचे माजी सभापती राजू लाटकर, युवक काँग्रेसचे पदाधिकारी व स्थायी समितीचे माजी सभापती आदिल फरास, माजी नगरसेवक अनिल कदम, पक्षाचे जिल्हा सरचिटणीस जयकुमार शिंदे हे शहराध्यक्ष पदाच्या रिंगणात आहेत. एप्रिल महिन्यात शहराध्यक्षपदासाठी निवडणूक प्रक्रिया राबविली होती. मात्र इच्छुकांची संख्या वाढल्याने गेल्या दोन महिन्यापासून शहराध्यक्षपद रिक्त आहे.
या पार्श्वभूमीवर प्रदेशाध्यक्ष पाटील हे सोमवारी कोल्हापुरात दाखल झाले. आमदार मुश्रीफ यांच्या नागाळा पार्कातील निवासस्थानी त्यांनी जिल्ह्यातील नेत्यांशी संवाद साधला. तसेच शहराध्यक्षपदासाठी इच्छुक पाचही जणांची स्वतंत्रपणे मुलाखत घेतली. प्रत्येकाने पक्षासाठी दिलेल्या योगदानाचा दाखला देत शहराध्यक्षपदासाठी दावा कायम ठेवला. प्रत्येकाची दहा ते पंधरा मिनिटे स्वतंत्रपणे मुलाखत घेतली. यानंतर सर्वांची एकत्रित बैठक झाली. दरम्यान, जिल्हाध्यक्षपदासाठी ए.वाय. पाटील यांचा एकमेव अर्ज असल्याने त्यांच्या बिनविरोध निवडीचा प्रस्ताव जिल्हा कार्यकारिणीने यापूर्वीच प्रदेश कार्यकारिणीकडे सादर केला आहे. त्यामुळे जिल्हाध्यक्ष निवडीच्या घोषणेची केवळ औपचारिकता शिल्लक आहे.
..........
गेल्यावेळी निवडून येऊनही बाजूला का केले ?
'राष्ट्रवादी शहराध्यक्षपदाच्या निवडणुकीत गेल्या वेळेला मी रितसर निवडून आलो होतो. पक्षाचे निरीक्षक इद्रिस नायकवडी यांनी निवडीचे पत्रही दिले होते. मात्र त्यानंतर मला शहराध्यक्षपदावरुन बाजूला करुन दुसऱ्यांना संधी दिली. मी निवडून आलो असतानाही मला त्यावेळी का बाजूला केले याचे कारण काही समजले नाही', अशा शब्दांत माजी महापौर आर. के. पोवार यांनी आपल्या भावना मांडल्या. पक्ष स्थापनेपासून सक्रिय, विविध जबाबदाऱ्या यशस्वीपणे सांभाळल्यामुळे पुन्हा शहराध्यक्षपदी संधी मिळावी अशी मागणी केली.
........................