कोल्हापूर टाइम्स टीम
येथील व्हिनस कॉर्नर मित्र मंडळाने राजर्षी शाहू महाराज यांची ५१ फूटी प्रतिकृती उभारून भाविकांचे लक्ष वेधले आहे. गणेशोत्सवात शाहूंच्या कार्यावरील लघुपट दाखवला जात आहे. मंडळाने यंदाही देखाव्यातील आपले वेगळेपण कायम राखले.
व्हिनस कॉर्नर मित्र मंडळाची स्थापना १९७६मध्ये झाली. प्रत्येकवर्षी मंडळ देखाव्यातून समाजप्रबोधन करते. कल्पक देखावा करत विविध ज्वलंत विषयावर प्रकाशझोत टाकला जातो. वर्षभर समाजोपयोगी उपक्रम राबण्यात पदाधिकारी अग्रेसर असतात. विधायक गणेशोत्सव साजरा करण्याकडे त्यांचा कल असतो. अनावश्यक खर्चाला फाटा देऊन यावर्षी न्यू पॅलेस परिसरातील महानगरपालिकेच्या शाळेस मंडळाने दहा हजारांची मदत केली.
राजर्षी शाहू महाराजांच्या दूरदृष्टीमुळे कोल्हापूरच्या विकासाला चालना मिळाली. त्यांच्या कामगिरीस देखाव्यातून उजाळा देण्याचा निर्णय मंडळाने घेतला. त्यासाठी ऐतिहासिक न्यू पॅलेसची भव्य अशी हुबेहूब प्रतिकृती तयार केली आहे. त्यात ५१ फुट उंच शाहूंची भारदस्त प्रतिकृती उभारण्यात आली आहे. कल्पकतेने आणि कौशल्याने केलेला हा देखावा पाहण्यासाठी गर्दी होत आहे. मोठ्या एलइडी स्क्रिनवर शाहूंच्या जीवनावरील लघुपट दाखविण्यात येत आहे. लघुपट पाहताना काही काळ परिसरात शिवकाळ अवतरल्याची अनुभूती प्रेक्षकांना येते. शाहूंचे कार्य अधिकाधिक लोकांपर्यंत पोहचवण्यासाठी देखाव्याचे केलेल्या प्रयत्नाचे भक्तांतून कौतुक होत आहे. मंडळाचे अध्यक्ष शशिकांत बिडकर, रफिक नाईकवाडी, विशाल भोकरे यांच्यासह पदाधिकाऱ्यांच्या नेतृत्वाखाली उत्सव साजरा केला जात आहे.
--------
कोट
राजर्षी शाहू महाराज आणि न्यू पॅलेसची मोठी प्रतिकृती तयार केली आहे. दोन दिवसापूर्वी देखावा पाहण्यासाठी खुला केला आहे. अनंत चतुर्थीपर्यंत पाहता येणार आहे. शाहूंची कामगिरी प्रत्येक भक्तास कळण्यासाठी लघुपट दाखवला जात आहे.
शशिकांत बिडकर, अध्यक्ष, व्हिनस कॉर्नर मित्रमंडळ
-----------