नऊ हजार रुपयांचा गुटखा जप्त

नऊ हजार रुपयांचा गुटखा जप्त

म. टा. प्रतिनिधी, कोल्हापूर

राज्यात गुटखानिर्मितीसह विकण्यावर बंदी असतानाही त्याची विक्री करणाऱ्या विक्रेत्यांवर अन्न व औषध प्रशासन विभागाच्या अधिकाऱ्यांसह पोलिसांनी बुधवारी कारवाई केली. विक्रेत्यांकडून साडेआठ हजार रुपये किमतीचा मुद्देमाल जप्त केला. पाच विक्रेत्यांविरोधात लक्ष्मीपुरी पोलिस ठाण्यात गुन्हा दाखल करण्यात आला आहे.

लक्ष्मीपुरी पोलिसांनी दिलेल्या माहितीनुसार, लक्ष्मीपुरी परिसरातील काही पान टपऱ्यांध्ये गुटख्याची छुपी विक्री सुरू असल्याची माहिती अन्न व औषध प्रशासनाला मिळाली होती. यानुसार गेल्या दोन दिवसांपासून संशयित विक्रेत्यांची तपासणी सुरू होती. बुधवारी सायंकाळी लक्ष्मीपुरी येथील पृथ्वी पान शॉप, साधना पान शॉप, जयभवानी पान शॉप, महालक्ष्मी पान शॉप आणि सुनीता पान शॉप याठिकाणी कारवाई करून साडेआठ हजारांचा गुटखा जप्त केला. गुटखाबंदी असतानाही छुप्या पद्धतीने गुटखा विक्री केल्याबद्दल शॉपी मालकांवर लक्ष्मीपुरी पोलिस ठाण्यात गुन्हा दाखल केला आहे. शाहूपुरी पोलिस ठाण्याच्या हद्दीतही काही विक्रेत्यांवर कारवाई करण्यात आली. मात्र, याचा तपशील अन्न व औषध प्रशासन विभागाने दिला नाही.

००००