जुन्या नोटांवर पोलिसांचा वॉच

Uddhav.Godase@timesgroup.com

Tweet @Uddhavg_MT

कोल्हापूर: केंद्र सरकारने हजार आणि पाचशे रुपयांच्या नोटा चलनातून रद्द केल्यानंतर नागरिकांकडे असलेल्या नोटा बँकांमध्ये भरण्यासाठी ३० डिसेंबरपर्यंत मुदत दिली आहे. याच काळात जिल्ह्यात नगरपालिकांच्या निवडणुका होत आहेत. या निवडणुकीत हजार पाचशेच्या जुन्या नोटांची ‘व्यवस्था’ लावण्याची संधी यानिमित्ताने अनेकांना मिळाली आहे, त्यामुळे जुन्या नोटांवर पोलिसांची विशेष नजर राहणार आहे. नोटांची देवाण-घेवाण आणि संशयास्पद व्यवहार रोखण्यासाठी पोलिस यंत्रणा दक्ष झाल्याने निवडणुकीत काळा पैसा खपवण्याचा प्रयत्न करणाऱ्यांवर कारवाईची टांगती तलवार आहे.

केंद्र सरकारने देशातील काळा पैसा रोखण्यासाठी चलनातील हजार आणि पाचशेच्या नोटा रद्द करून धनदांडग्यांना मोठा धक्का दिला. काळा पैसा दडपून ठेवणाऱ्या मोठ्या व्यावसायिकांना या निर्णयाने धक्का दिला, त्याचबरोबर आगामी नगरपालिका निवडणुकीतील ‘पैसेवाल्या’ उमेदवारांचेही धाबे दणाणले आहेत. काही अतिउत्साही उमेदवारांनी तर आरक्षण जाहीर होताच लाखोंची व्यवस्था केली होती. केंद्र सरकारच्या नोटाबंदीच्या निर्णयाने क्षणात या नोटांनी उमेदवारांचे टेन्शन वाढवले. जुन्या नोटा वापरात आणण्यासाठी उमेदवार नवीन शक्कल लढवण्याची शक्यता आहे. जुन्या नोटा बँकांमध्ये जमा करण्यासाठी ३० डिसेंबरपर्यंतची मुदत मिळाल्याने जवळच्या पैशांची व्यवस्था लावण्याची तयारी उमेदवारांकडून सुरू आहे. मतदारांना हजार, पाचशेच्या नोटा देऊन त्यांच्या बँक खात्यात जमा करण्यास सांगायचे. नोटाही चलनाच येतील आणि टेन्शनही जाईल, असे नियोजन उमेदवारांकडून सुरू आहे.

नगरपालिका निवडणुकीत हजार, पाचशेच्या नोटांचा मोठ्या प्रमाणात वापर होण्याची कुणकूण पोलिसांना लागल्याने पोलिस यंत्रणाही दक्ष झाली आहे. एका ठिकाणाहून दुसऱ्या ठिकाणी जाणाऱ्या मोठ्या रकमांवर पोलिसांचा वॉच राहणार आहे. बँकांच्या कॅश व्हॅनचा किंवा अशा प्रकारच्या वाहनांचा वापर नोटा घेऊन जाण्यासाठी होऊ शकतो. काही सहकारी बँकांसह पतसंस्थांमध्येही असे व्यवहार होऊ शकतात, त्यामुळे संशयास्पद व्यवहारांवर पोलिस विशेष लक्ष ठेवणार आहेत. यासाठी भरारी पथके आणि गस्ती पथकांना विशेष सूचना देण्यात आल्या आहेत. ३० डिसेंबरपर्यंत नाकाबंदीही नियमित सुरू राहणार आहे, अशी माहिती पोलिस अधीक्षक महादेव तांबडे यांनी दिली.

सायबर, आर्थिक गुन्हे रोखणार

सायबर आणि आर्थिक गुन्ह्यांच्या संख्येत वाढ झाली आहे. सायबर गुन्हे रोखण्यासाठी राज्य सरकारच्यावतीने सायबर लॅब व सायबर मोबाईल व्हॅन सुरू केली आहे. याद्वारे गुन्ह्यांना आळा बसेल, मात्र या फसवणुकीच्या प्रकारांमध्ये लोकांची जागृतीही महत्त्वाची आहे. आर्थिक फसवणुकीचे गुन्हे रोखण्यासाठी जिल्ह्यातील सर्व पोलिस अधिकार्‍यांची बैठक घेऊन विशेष सूचना देणार असल्याचेही पोलिस अधीक्षक तांबडे यांनी सांगितले.