सांगलीत जुन्या नोटांचं घबाड, तिघांना अटक

इस्लामपूर:

वाळवा तालुक्यातील येडेमच्छिंद्र येथे छापा टाकून इस्लामपूर पोलिसांनी सुमारे १ कोटी रुपयांच्या जुन्या नोटा जप्त केल्या आहेत. यामध्ये ५०० च्या जुन्या नोटांचा समावेश आहे. याप्रकरणी पोलिसांनी तिघाजणांना ताब्यात घेतले आहे. एवढी मोठी रक्कम सापडल्याने तालुक्यात एकच खळखळ माजली आहे.

येडेमच्छिंद्र येथे जुन्या नोटा असल्याची माहिती पोलिसांना मिळाली होती. यानंतर मंगळवारी रात्री उशिरा पोलिस निरिक्षक नारायण देशमुख यांनी पथकासह छापा टाकला. यामध्ये ५०० च्या ९९ लाख ९७ हजार ५०० रुपये किंमतीच्या जुन्या नोटा मिळून आल्याचे देशमुख यांनी सांगितले. या नोटा कुठून आल्या? व कोणाच्या आहेत? याचा पोलिस शोध घेत आहेत.