स्वाइन फ्लूने उचगाव येथे एकाचा मृत्यू

म. टा. वृत्तसेवा, कसबा बावडा

उचगाव (ता. करवीर) पूर्वभाग शांतीनगर फासेपारधी वसाहतीतील रमेश अरूण चव्हाण (वय ४५) यांचा स्वाइन फ्लूने मंगळवारी पहाटे मृत्यू झाला. ते गेले १५ दिवस शहरातील एका खासगी रुग्णालय येथे उपचार घेत होते. चव्हाण हे काही दिवसांपूर्वी आपल्या कुटुंबीयांसह बाहेरगावी फिरायला गेले होते. तेथून परत आल्यानंतर त्यांना ताप, सर्दीचा त्रास होत होता. निमोनियासदृश आजाराचे निदान झाल्यानंतर शहरातील एका खासगी रुग्णालयात दाखल करण्यात आले. उपचार सुरू असताना मंगळवारी पहाटे मृत्यू झाला. खासगी रुग्णालयातून आलेल्या अहवालानुसार चव्हाण यांचा मृत्यू स्वाइन फ्ल्यूने झाल्याचे स्पष्ट झाले. चव्हाण हे कर्मवीर हिरे महाविद्यालयात शिपाई म्हणून कार्यरत होते. त्यांच्या पश्चात पत्नी, मुलगा, तीन मुली, जावई, नातवंडे असा परिवार आहे.