मिरजेत तेरा लाखांची ‘ऑनलाइन’ फसवणूक

मिरज शहरातील एका महाविद्यालयाचे कार्यालयीन अधीक्षक असलेले शहाजहान अमीर मुजावर (वय ५६ रा. कृषी कॉलनी, स्फूर्ती चौक, विश्रामबाग) यांना ऑनलाइन टाटा सफारी वाहन बक्षीस लागल्याचे सांगून १३ लाख १६ हजार ७५० रुपयांचा गंडा घातल्याचा प्रकार उघडकीस आला आहे. या बाबत मुजावर यांनी चौघांविरोधात महात्मा गांधी पोलिसांत तक्रार दिली आहे.
मुजावर यांनी काही दिवसांपूर्वी ऑनलाइन घरगुती साहित्य खरेदी केले होते. काही दिवसांनी त्यांना मोबाइलवर फोन आला की, तुम्ही घेतलेल्या घरगुती साहित्यावर बंपर बक्षीस लागले आहे. तुम्ही रोख रक्कम किंवा टाटा सफारी चारचाकी वाहन दोन्हीपैकी एक घेऊ शकता. त्यासाठी तुम्हाला वाहनाच्या एकतृतीयांश रक्कम भरावी लागेल. त्यानंतर मुजावर यांनी फोनवरील व्यक्तीने सांगितल्याप्रमाणे स्टेट बँक मिरज शाखेत काही रक्कम भरली. काही दिवसांनी त्या व्यक्तींचा पुन्हा फोन आला आणि आणखी काही रक्कम भरण्यास सांगितले.
मुजावर यांनी टाटा सफारीच्या मोहापोटी पुन्हा काही रक्कम भरली. तरीही त्या व्यक्तींचे समाधान झाले नाही. त्यांनी मुजावर यांच्याकडे विविध व्यक्तींच्या नावे रक्कम भरण्यास सांगतच राहिले, असे करीत मुजावर यांनी सुमारे १३ लाख १६ हजार ७५० रुपये रक्कम बँकेत भरले. मुजावर यांनी वारंवार फोनवरुन वाहन अथवा बंपर बक्षीसाची मागणी करण्यास सुरुवात करताच फोन वरील व्यक्ती उडवाउडवीची उत्तरे देऊ लागल्याने मुजावर यांना आपली फसवणूक झाल्याचे लक्षात आले. मुजावर यांनी स्टेट बँकेत ज्या व्यक्तींच्या खात्यावर रक्कम भरले होते, अशा राहुल सिन्हा, मनोज पांडे, विनोद कुमार, राहुल कुमार या व्यक्तींच्या विरोधात महात्मा गांधी पोलिसात फसवणुकीची तक्रार दिली आहे.