इंधनाचा जीएसटीत समावेश करण्याची मागणी
Uddhav.Godase@timesgroup.com
Tweet @Uddhavg_MT
कोल्हापूर;
सातत्याने वाढणारा पेट्रोलचा दर प्रतिलिटर ९० रुपयांवर पोहोचला आहे, तर डिझेलचा दर ७७ रुपयांवर गेला. गेल्या वर्षभरात कोल्हापुरात पेट्रोलच्या दरात प्रतिलिटर १० रुपयांची वाढ झाली असून, डिझेलच्या दरात १५ रुपयांची वाढ झाली. रोजच्या दरवाढीमुळे नागरिकांचा संयम सुटत असून सरकारने तातडीने इंधनाचा समावेश जीएसटीत करावा, या मागणीने जोर धरला आहे.
गेल्या वर्षभरात कोल्हापूरकरांना इंधन दरवाढीची मोठी झळ सोसावी लागली. ऑक्टोबर २०१७ मध्ये शहरात पेट्रोलचे दर प्रतिलिटर ८० रुपये २६ पैसे होते. मंगळवारी (ता. २५) शहरात पेट्रोलचा दर ९० रुपये २९ पैसे होता. डिझेलच्या दरात एका वर्षात तब्बल १५ रुपयांची वाढ झाली. ऑक्टोबर २०१७ मध्ये डिझेलचा दर ६२ रुपये १८ पैसे होता. मंगळवारी हा दर ७७ रुपये ६१ पैसे झाला. डिझेलच्या दरवाढीने वाहतूक व्यवस्थेचे कंबरडे मोडले असून, कोणत्याही क्षणी दरवाढीचा सामना करण्याची वेळ नागरिकांवर येऊ शकते.
सरकारने 'एक देश एक कर' अशी घोषणा करीत जीएसटी लागू केला. मात्र, यात इंधनाचा समावेश न केल्याने त्यावर भरमसाठ कर लावून नागरिकांच्या खिशातून पैसे काढल्याचा आरोप वाहतूकदार संघटनांनी केला आहे. याशिवाय इतर राज्यांच्या तुलनेत महाराष्ट्रात सर्वाधिक कर लावले आहेत. दुष्काळ, कर्जमाफी, दारुविक्री बंदी, शैक्षणिक, कृषी यासह व्हॅटमुळे इतर राज्यांच्या तुलनेत महाराष्ट्रात १० ते १५ रुपयांनी पेट्रेल, डिझेल महाग असल्याचे गणित वाहतूकदार संघटना मांडतात. जीएसटीमध्ये समावेश केल्यास इंधनावर २८ टक्क्यांपेक्षा अधिक कर लावता येणार नाहीत. सध्या इंधनावर सुमारे ६० टक्के करांची आकारणी केली जाते.
पेट्रोल, डिझेलचा उत्पादन खर्च आणि त्यावरील करांमध्ये मोठी तफावत आहे. पेट्रोलची प्रतिलिटर मूळ किंमत केवळ ३९ रुपये ३४ पैसे आहे, तर डिझेलची ४३ रुपये ३ पैसे आहे. यात केंद्र आणि राज्य सरकारचे उत्पादन शुल्क, व्हॅट यासह इतर अनुषंगिक करांचा बोजा लादला आहे. देशातील इतर राज्यांच्या तुलनेत महाराष्ट्रात मोठ्या प्रमाणात करांची आकारणी केल्याने इंधनासाठी जादा पैसे मोजावे लागत आहेत.
...............
चौकट
वर्षभरातील इंधन दरवाढ
तारीख पेट्रोल डिझेल
३ ऑक्टोबर २०१७ ८०.२६ ६२.१८
२६ मार्च २०१८ ८०.९२ ६७.०६
२७ ऑगस्ट २०१८ ८५.६२ ७२.९३
२५ सप्टेंबर २०१८ ९०.२९ ७७.६१
..................
चौकट
इंधनावरील करांची रचना रुपयांमध्ये
कर पेट्रोल डिझेल
उत्पादन किंमत ३९.२७ ४२.९०
केंद्राचे उत्पादन शुल्क १९.४८ १५.३३
राज्याचा व्हॅट २३.९८ १४.५८
पंपचालकांचे कमिशन ३.६४ २.५३
इतर कर ३.९२ २.२७
एकूण ९०.२९ ७७.६१
....................
कोट
'सततच्या दरवाढीमुळे पेट्रोल पंपावर वाहनधारक आणि कर्मचाऱ्यांमध्ये वादाचे प्रसंग घडतात. वाहनधारकांचा संयम सुटत आहे. २८ सप्टेंबरला जीएसटी काउन्सिलची बैठक होत आहे. काउन्सिलने या बैठकीत इंधन दरवाढीचा विचार करून तातडीने नागरिकांना दिलासा द्यावा.
गजकुमार माणगावे, अध्यक्ष, पेट्रोल पंपचालक असोसिएशन
....................
कोट
'डिझेलची दरवाढ असह्य झाली आहे. मालवाहतुकीचे नियोजन कोलमडले असून, सरकारने डिझेलच्या तुलनेत वाहतुकीचे दर जाहीर करावेत. गेली दोन वर्षे वाहतूकदार तोटा सोसून व्यवसाय करीत आहेत. सरकारने किमान व्हॅट आणि स्थानिक दर कमी करावेत.
सुभाष जाधव, अध्यक्ष, लॉरी ऑपरेटर्स असोसिएशन