विष तस्करीप्रकरणी चौघांना कोठडी

म. टा. वृत्तसेवा, आजरा

शुक्रवारी मध्यरात्री आजरा पोलिसांनी विष तस्करी प्रकरणी ताब्यात घेतलेल्या चौघांना शनिवारी न्यायालयाने तीन दिवसांची पोलीस कोठडी सुनावली. माद्याळ (ता. आजरा) फाट्यावर चौघांना पोलिसांनी ताब्यात घेतले होते. याप्रकरणी तानाजी लक्ष्मण कांबळे (वय ३६, रा-मेढेवाडी), अनिल शंकर कांबळे (३०, रा.बडस, बेळगाव), तौसिफ उर्फ समीर बाबाजान नासुर (२९, आमराई कॉलनी, फोंडा, पणजी) व रामचंद्र करू पाटील (म्हाळुंगे, ता.चंदगड, सध्या रा. आजरा) यांना अटक केली आहे.

शुक्रवारी रात्री हे चौघेजण सापाचे विष घेऊन विकण्यासाठी जाणार असल्याची माहिती पोलिसांना खबऱ्याने दिली. त्यानुसार माद्याळ फाटा येथे सापळा लावून त्यांना ताब्यात घेतले होते. त्यावेळी त्यांच्याकडे प्लास्टिक बाटलीत सापाचे विष आढळून आले. या विषाची बाजारपेठेत अंदाजे ३५ लाख रुपये आहे. हे विष देसाई नामक व्यक्तीस १२ लाख रुपयांना विकण्याचा या चौघांचा प्रयत्न होता. त्यानुसार दोन मोटार सायकलींवरून जात असलेल्या चौघांना मोटारसायकलीसमवेत ताब्यात घेण्यात आले. दरम्यान देसाई या व्यक्तीस ताब्यात घेण्यासाठी एक पथक पाठविण्यात आल्याचे पोलिस निरीक्षक सुनील पाटील यांनी सांगितले. दरम्यान या प्रकरणातील पाटील हा सूत्रधार असून, यापूर्वी वर्षभरापूर्वी पुणे जिल्ह्यात घडलेल्या अशा प्रकरणातील आरोपी असल्याची माहितीही पुढे आली आहे. आजरा तालुका व परिसरात जंगल व दुर्मिळ सापांच्या जाती असल्याने पैसे मिळविण्याच्या हव्यासाने अशा प्रकारे विषाची तस्करी करणारे मोठे रॅकेट कार्यरत आहे.