साताऱ्यात ६० लाखांच्या नव्या नोटा जप्त

मटा ऑनलाइन वृत्त । सातारा

पाचशे आणि एक हजार रुपयाच्या जुन्या नोटा बदलून देणाऱ्या तिघांना आज सकाळी साताऱ्यातून अटक करण्यात आली. या तिघांकडून ६० लाख रुपयांच्या दोन हजाराच्या नव्या नोटा जप्त करण्यात आल्या आहेत. अटक करण्यात आलेले तिघेही कोल्हापुरातील आहेत.

सागर दत्तात्रय आरडे, भगवान बिराप्पा भोपळे (राजारामपुरी-कोल्हापूर), उमेश कांबळे (कोळे, ता. कराड) हे तिघे होंडा सीटी गाडीतून साताऱ्यातील बॅाम्बे रेस्टॅारंट चौकात आले होते. जुन्या नोटा बदलून देण्यासाठी ते आले होते. याबाबतची माहिती स्थानिक गुन्हे अन्वेषण विभागाचे निरीक्षक पदमाकर घनवट यांना मिळाली. त्यानुसार त्यांनी कारवाई करून तिघांनाही ताब्यात घेण्यात आले.

तिघांकडून ६० लाख रुपये किंमतीच्या २ हजार रुपयांच्या नोटा जप्त करण्यात आल्या आहेत. प्राप्तीकर विभागाच्या मदतीने पुढील चौकशी सुरु असल्याचे पोलिस अधिक्षक संदीप पाटील यांनी सांगितले. ३० टक्के दराने ते नोटा बदलून देत असल्याचे समोर आले आहे. अशा प्रकारे नोटा बदलणाऱ्यांची माहिती देणाऱ्यास १० हजार रुपयांचे बक्षीस पोलिस अधिक्षकांनी जाहिर केले आहे.