प्रलंबित मागण्यांबाबत
सकारात्मक चर्चा
'सुटा' सदस्यांनी घेतली कुलगुरूंची भेट
म. टा. प्रतिनिधी, कोल्हापूर
शिवाजी विद्यापीठाशी संलग्न असलेल्या महाविद्यालयांतील प्राध्यापकांच्या अनेक प्रलंबित प्रश्नांची दखल घेऊन त्यांची सोडवणूक व्हावी, या मागणीसाठी विविध विषयांवर शिवाजी विद्यापीठ शिक्षक संघाच्या सदस्यांनी (सुटा) कुलगुरू डॉ. देवानंद शिंदे यांची गुरुवारी भेट घेतली. यावेळी सुटा सदस्य व कुलगुरू यांच्यात झालेल्या बैठकीत प्राध्यापकांच्या प्रश्नांबाबत सकारात्मक चर्चा झाली.
मिरज येथील काही संस्थाचालकांकडून प्राध्यापकांना होत असलेल्या त्रासाबाबत गेल्या अनेक दिवसांपासून तक्रारी वाढल्या आहेत. यासंदर्भात प्राध्यापकांनी सुटाच्या कार्यकारिणीसोबत चर्चा केली आहे. संबंधित कॉलेजच्या प्राचार्यांशी चर्चा करून तातडीने निर्णय घेण्याची मागणी या बैठकीत सुटातर्फे कुलगुरूंकडे करण्यात आली. तसेच प्राध्यापकांच्या किरकोळ रजेसंदर्भात अधिकृत परिपत्रक काढण्याचा मुद्दाही या बैठकीत चर्चेसाठी घेण्यात आला होता. सहसंचालकांनी प्राध्यापकांच्या हक्काच्या किरकोळ रजेबाबत स्वतंत्र नियम केल्यामुळे त्याचा फटका प्राध्यापकांना बसत आहे. विद्यापीठ प्रशासनाने याबाबत अधिकृत परिपत्रक काढून प्राध्यापकांच्या रजेबाबत धोरण निश्चित करावे जेणेकरून त्यांच्यावर सध्या सहसंचालक कार्यालयामार्फत लादण्यात येणाऱ्या जाचक अटी रद्द होतील अशी मागणी यावेळी करण्यात आली.
गेल्या आठवड्यात झालेल्या विद्यापीठ सिनेट सभेसाठी सुटाने उपस्थित केलेल्या लेखी प्रश्नांना नाकारल्याने सुटाच्या सदस्यांनी या सभेवर बहिष्कार टाकला होता. सुटातर्फे कुलगुरूंच्या कार्यपद्धतीवर आक्षेप नोंदविण्यात आले होते. कुलगुरू नामनिर्देशित सदस्यांच्या निवडीवरून आरोपही केले होते. या पार्श्वभूमीवर आज झालेल्या बैठकीतील चर्चेबाबत सुटा सदस्यांना कुलगुरूंकडून सकारात्मक आश्वासन देण्यात आले. सुटाने दाखविलेल्या त्रुटी, आक्षेप यांची पडताळणी करून निर्णय घेण्याचे आश्वासनही कुलगुरूंनी दिले.
बैठकीस प्र-कुलगुरू डॉ. डी. टी. शिर्के, कुलसचिव डॉ. विलास नांदवडेकर, सुटाचे अध्यक्ष डॉ. आर. एच. पाटील, कोल्हापूर जिल्हाध्यक्ष डॉ. अरुण पाटील, कार्यवाह एस.जी. कोरबू, सुधाकर मानकर, आदी उपस्थित होते.