म. टा. वृत्तसेवा वारणानगर
वारणानगर (ता. पन्हाळा) येथील वारणा बाल वाद्यवृंदचे बालकलाकार ग. दि. माडगूळकर आणि सुधीर फडके यांच्या जन्मशताब्दी वर्षाचे औचित्य साधून ५ जानेवारीला सायंकाळी चार वाजता कोल्हापुरातील संगीतसूर्य केशवराव भोसले नाट्यगृहात गीतरामायण सादर करणार आहेत. कार्यक्रमाच्या पहिल्याच प्रयोगाला गदिमांचे पुत्र शरतकुमार माडगूळकर, नातू समित्र माडगूळकर व त्यांचे कुटुंबीय उपस्थित राहणार असल्याची माहिती वारणा समूहाचे नेते डॉ. विनय कोरे यांनी पत्रकार परिषदेत दिली.
डॉ. कोरे म्हणाले, 'देशपातळीवर आणि विदेशातही वारणेचे नाव गाजवणाऱ्या वारणा बाल वाद्यवृंद पुन्हा एकदा वेगळा प्रयत्न करून दोन ख्यातनाम कवी आणि गायकांना आदरांजली म्हणून हा कार्यक्रम सादर करणार आहेत. सर्वांगीण ग्रामीण विकासाचे ध्येय डोळ्यासमोर ठेवून काम करणाऱ्या सहकारमहर्षी तात्यासाहेब कोरे यांनी वारणेत शिक्षण, कला, क्रीडा, संस्कृती जपण्याचे काम केले. १९६९ साली त्यांनी अभिजात भारतीय संगीताचे संस्कार विद्यार्थ्यांवर व्हावेत या उद्देशाने वारणा बाल वाद्यवृंद सुरू केले. गेली ५० वर्षे वारणा बाल वाद्यवृंदचे बाल कलाकार भारतीय संगीताची साधना अखंडपणे करीत आहेत. या प्रवासात त्यांनी संगीत सौभद्र, महाराष्ट्राचे लोकसंगीत यांसारखे अनेक प्रयोग यशस्वी केले.'
पाच जानेवारीला कोल्हापुरात होणाऱ्या कार्यक्रमासाठी महसूलमंत्री चंद्रकांत पाटील, कृषी राज्यमंत्री सदाभाऊ खोत, संगीत, कला क्षेत्रातील दिग्गजांबरोबरच कोल्हापूर, सांगली जिल्ह्यांतील राजकीय क्षेत्रातील मान्यवर उपस्थित राहणार असल्याचे कोरे यांनी सांगितले.