म. टा. प्रतिनिधी, कोल्हापूर
जिल्ह्यातील मतदान केंद्रांवर वीज, पाणी अशा मूलभूत सुविधांसह दिव्यांगांसाठी व्हीलचेअर आणि आवश्यक त्या ठिकाणी मंडप घालावेत, अशा सूचना जिल्हाधिकारी तथा जिल्हा निवडणूक अधिकारी दौलत देसाई यांनी मंगळवारी दिल्या.
जिल्हाधिकारी कार्यालयात झालेल्या बैठकीत ते बोलत होते. देसाई म्हणाले, 'अजूनही पाऊस पडत आहे. मतदानादिवशी पावसाचे वातावरण निर्माण झाल्यास गरज आहे, त्या ठिकाणी मंडप उभारावे. दिव्यांग मतदारांसाठी व्हीलचेअर, रॅम्प, प्रथमोपचार साहित्य उपलब्ध करून द्यावे. निवडणूक निर्णय अधिकारी यांच्याशी समन्वय ठेवून सुविधा निर्माण कराव्यात. वेबकास्टिंग, वाहनांवर जीपीएस सिस्टीम, निवडणूक साहित्य वाटप करण्यावर विशेष लक्ष द्यावे. मतदार जनजागृतीसाठी प्रत्येक मतदारसंघात चित्ररथ फिरवावा.'
बैठकीस पोलिस अधीक्षक डॉ. अभिनव देशमुख, मुख्य कार्यकारी अधिकारी अमन मित्तल, निवासी उपजिल्हाधिकारी भाऊसाहेब गलांडे, निवडणूक विभागाचे उपजिल्हाधिकारी सतिश धुमाळ, उपजिल्हाधिकारी हेमंत निकम, जिल्हा खनिकर्म अधिकारी अमोल थोरात, उप प्रादेशिक परिवहन अधिकारी डॉ. स्टीव्हन अल्वारिस, जिल्हा परिषदेचे मुख्य लेखा व वित्त अधिकारी संजय राजमाने, उपजिल्हाधिकारी रामहरी भोसले, उपमुख्य कार्यकारी अधिकारी प्रियदर्शनी मोरे आदी उपस्थित होते.