शहिदांच्या कुटुंबांना पोलिसांचा पगार

३० लाखांची मदत देणार

कोल्हापूर

काश्मीरमधील पुलवामा येथे दहशतवाद्यांनी केलेल्या हल्ल्यात शहीद झालेल्या महाराष्ट्रातील जवानांच्या कुटुंबीयांसाठी कोल्हापूर पोलीस एक दिवसाचा पगार देणार आहेत. पोलीस अधीक्षक कार्यालयात शनिवारी झालेल्या बैठकीत हा निर्णय घेण्यात आला. सुमारे ३० लाखांची मदत केली जाणार असल्याची माहिती अधीक्षक डॉ. अभिनव देशमुख यांनी दिली.

दहशतवाद्यांनी गुरुवारी दुपारी पुलवामा येथे जवानांच्या वाहनांच्या ताफ्यावर हल्ला केला. या हल्ल्यात महाराष्ट्रातील बुलडाणा जिल्ह्यातील दोन जवान शहीद झाले आहेत. शहीद जवानांच्या मदतीसाठी कोल्हापूर पोलीस सरसावले आहेत. पोलीस अधीक्षक कार्यालयात शनिवारी सर्व पोलीस ठाण्यांचे प्रभारी अधिकारी आणि वरिष्ठ अधिकाऱ्यांच्या बैठकीत मदतीचा निर्णय घेण्यात आला. जिल्ह्यातील पोलीस अधिकारी आणि कर्मचाऱ्यांचा एक दिवसाचा पगार शहिदांच्या कुटुंबीयांना दिला जाणार आहे. जिल्ह्यात तीन हजार पोलीस आहेत. केंद्रीय गृह मंत्रालयाने जाहीर केलेल्या वेबसाइटवरील बँक खात्यांवर पोलिसांकडून ३० लाखांची रक्कम जमा केली जाणार आहे. ही मदत बुलडाणा जिल्ह्यातील नितीन राठोड व संजय रजपूत यांच्या कुटुंबीयांना मिळणार आहे, अशी माहिती अधीक्षक देशमुख यांनी दिली.