म. टा. वृत्तसेवा, जयसिंगपूर
येथील राजीव गांधीनगरमध्ये नवव्या गल्लीत राहणाऱ्या कोंडाबाई बाबासाहेब बारूदवाले (वय ६५) यांचा रेबीजने मृत्यू झाला. यामुळे शहर व परिसरात घबराटीचे वातावरण निर्माण झाले आहे. मोकाट कुत्र्यांच्या बंदोबस्तासाठी पालिकेने मोहीम हाती घेतली असली तरी अद्याप शहराच्या अनेक भागांत मोकाट कुत्री आहेत. ती त्वरित पकडावीत, अशी मागणी नागरिकांतून होत आहे.
कोंडाबाई बारुदवाले यांना सहा महिन्यांपूर्वी घराजवळ भटक्या कुत्र्याने चावा घेतला होता. त्यावेळी त्या प्राथमिक आरोग्य केंद्रात प्रतिबंधक लस घेण्यासाठी गेल्या होत्या. मात्र, लस न घेताच त्या परतल्या. यानंतर त्यांनी घरगुती उपचार केले. दरम्यान, बुधवारी रात्री त्यांना उलटीसह ताप आला. गुरुवारी सकाळी त्यांना येथील संजीवनी रुग्णालयात दाखल केले. त्यावेळी घसा कोरडा पडणे, अंग दुखणे यासह अन्य रेबीजची लक्षणे त्यांच्यात आढळली. प्रकृती गंभीर बनल्याने त्यांना तत्काळ सांगलीतील शासकीय रुग्णालयात दाखल केले. मात्र, शुक्रवारी दुपारी एकच्या सुमारास त्यांचा मृत्यू झाला. त्यांच्या पश्चात मुलगा, सून, नातवंडे, बहीण असा परिवार आहे. जयसिंगपूर शहर व परिसरात यापूर्वी रेबीजने दोघांचा मृत्यू झाला आहे.