म. टा. प्रतिनिधी, कोल्हापूर
करोनाचा संसर्ग आणि प्रादुर्भाव रोखण्यासाठी सरकारने दिलेल्या आदेशानुसार जिल्ह्यात ३१ मे पर्यंत लॉकडाउन बंदी आदेश जिल्हाधिकारी दौलत देसाई यांनी रविवारी सायंकाळी काढला. जिल्हा प्रशासनाने यापूर्वी काही उद्योग आणि व्यवसायांना जी सूट दिली होती ती कायम राहणार असून अंतर्गत रेल्वे, बस, आणि रिक्षा वाहतुकीवर निर्बंध कायम राहणार आहेत.
लॉकडाउन जाहीर होण्यापूर्वी कोल्हापूर जिल्ह्याचा समावेश ऑरेंज झोनमध्ये असून गेल्या तीन दिवसांत रुग्णांची संख्या वाढली असल्याने कोल्हापूर जिल्हा रेड झोनमध्ये जाण्याची भिती सतावत आहे. या पार्श्वभूमीवर केंद्र सरकारकडून करोनाबाधित जिल्ह्यांचे वर्गीकरण प्राप्त झाल्यानंतर आदेशामध्ये आवश्यक बदल करण्या येणार असल्याचे जिल्हाधिकाऱ्यांनी स्पष्ट केले आहे.
लॉकडाउनच्या पहिल्या दिवसापासून जीवनावश्यक वस्तूंची विक्री आणि वाहतूक सुरू होती. यापुढे दूध, भाजीपाला विक्री आणि किराणा दुकाने सुरक्षित वावर संबधीचे नियम पाळून सुरू राहणार आहेत. तसेच काही उद्योगधंदे आणि व्यवसायांनाही सूट दिली आहे. ही सूट यापुढे कायम राहणार असून त्यांना सुरक्षित वावर संबधीच्या नियमांची काटेकोरपणे अंमलबजावणी करावी लागणार आहे.
शहरातील व्यापारी पेठा आणि औद्योगिक वसाहतीत व्यवहार सुरू आहेत. हे व्यवहार यापुढे कायम राहणार आहे. शहरात सम विषम तारखेला दुकाने सुरू राहणार आहेत. जिल्ह्यातील एसटी, केएमटी आणि रिक्षा वाहतूक यापुढेही बंद राहणार आहे. हॉटेल, रेस्टॉरंट बंद राहणार असून फक्त पार्सल सेवा सुरू राहणार आहे. सरकारी कार्यालयातील कँटिन सुरू करण्याबाबत कोणताही निर्णय झालेला नाही.
...
हे बंद राहणार
ऑटो रिक्षा, सहा आसनी रिक्षा, टॅक्सी वाहतूक
पानपट्टी आणि तंबाखूजन्य पदार्थ विक्रीची दुकाने
स्पा, मसाज सेंटर, पार्लर, सलून
शाळा, महाविद्यालये
हॉटेल, रेस्टॉरंट, मॉल्स, शॉपिंग मार्केट
व्यायामशाळा, क्रीडासंकुले, जलतरणतरण तलाव, चित्रपटगृहे
...
...
हे सुरू राहणार
शहर आणि ग्रामीण भागातील औद्योगिक कारखाने
शेती आणि शेतीवर आधारित उद्योग
दूध संकलन आणि वितरण
शहर आणि ग्रामीण भागातील बांधकामे
जीवनावश्यक वस्तूंची दुकाने आणि सेवा.