'उदयनराजेंना अटक झाल्यास महाराष्ट्र पेटेल'

मटा ऑनलाइन वृत्त । सांगली

खंडणीसाठी उद्योजकाला मारहाण करून धमकावल्याप्रकरणी खासदार उदयनराजे यांच्यावर गुन्हा दाखल आहे. मुंबई हायकोर्टाने खासदार उदयनराजे यांचा अटकपूर्व जामीनअर्ज फेटाळल्याने त्यांच्या अटकेची चर्चा सुरू आहे. ' मात्र उदयनराजे भोसले यांना अटक झाल्यास संपूर्ण महाराष्ट्र पेटून उठेल आणि रस्त्यावर येईल' असा इशारा देत संभाजी भिडे गुरूजी उदयनराजेंच्या समर्थनार्थ मैदानात उतरले आहेत. एका वृत्तवाहिनीशी ते बोलत होते.

'उदयनराजे यांच्यावर करण्यात आलेले आरोप घाणेरडे आहेत, मुख्यमंत्री फडणवीस यांनी याप्रकरणाकडे लक्ष द्यावे. उदयनराजेंकडून अशी वागणूक कधीही होणार नाही, त्यामुळे त्यांच्या अटकेसाठी सुरू असलेले प्रयत्न थांबवावेत. त्यांची अटक आम्ही कधीच खपवून घेणार नाही. तसे झाल्यास संपूर्ण महाराष्ट्र पेटून उठेल आणि रस्त्यावर उतरेल' असा इशारा भिडे गुरुजींनी दिला.

काय आहे प्रकरण?
खासदार उदयनराजे यांच्यावर खंडणीसाठी व्यापाऱ्याला धमकावल्याचा गुन्हा सातारा शहर पोलिस ठाण्यात नोंद आहे. या गुन्ह्यातील इतर १० संशयितांना यापूर्वीच अटक झाली आहे. जिल्हा कोर्टाने अटकपूर्व जामीन नाकारल्यानंतर उदयनराजे यांनी मुंबई हायकोर्टात धाव घेतली होती. हायकोर्टाने उदयनराजे यांचा जामीन अर्ज फेटाळल्यानंतर वेळप्रसंगी उदयनराजे यांना अटक करणार असल्याचे वक्तव्य आयजी नांगरे-पाटील यांनी केले होते. शुक्रवारी उदयनराजे साताऱ्यात आले असता त्यांचे हजारो समर्थक रस्त्यावर उतरले होते.

उदयनराजे पोलीस ठाण्यात हजर
न्यायालयाने अटकपूर्व जामीन फेटाळल्यानंतर साताऱ्यात परतलेले उदयनराजे काही वेळापूर्वीच स्वत:हून सातारा शहर पोलीस ठाण्यात हजर झाले आहेत. पोलीस पुढे काय कारवाई करतात याकडे सर्वांचे लक्ष लागले आहे.