आमदार सुरेश हाळवणकर व डॉ. सुजित मिणचेकर हे सत्ताधारी भाजप-शिवसेनेचे असे दोन आमदार असतानाही हातकणंगले तालुक्याचा दहा वर्षांत विकासासाठी मोठ्या प्रमाणात झगडावे लागले असून पंचगंगा नदी प्रदूषण, सांगली-कोल्हापूर महामार्ग, हुपरीची चांदी क्लस्टर योजना, हातकणंगले क्रीडासंकुल, तीन औद्योगिक वसाहतींतीमधल रस्ते, पेठवडगाव बायपास रस्ता आदींसह अनेक महत्त्वाची विकासकामे दहा वर्षांत पूर्ण करता आले नाहीत. त्यामुळे तालुक्यात नाराजीचा सूर उमटत आहे.
तालुक्यातील सांगली-कोल्हापूर महामार्गावरील अनेक कामे संबंधित ठेकेदाराने निकृष्ट दर्जाची केल्याने अनेक तक्रारी झाल्यानंतर त्याला काळ्या यादीत टाकले आहे. यामुळे ठेकेदार न्यायालयात गेल्याने हा वाद न्यायालयात प्रलंबित आहे. हा महामार्ग नागपूर-रत्नागिरी राष्ट्रीय महामार्गाचा समावेश होऊन जमीन अधिग्रहण प्रक्रिया अद्याप सुरू आहे. चांदी व्यवसायासाठी देशभर प्रसिद्ध असलेल्या चंदेरी नगरी हुपरी शहरासाठी प्रलंबित असलेली चांदी क्लस्टर योजना गेल्या चौदा वर्षांपासून रखडल्यामुळे उद्योजकांतून नाराजी व्यक्त होत आहे. हातकणंगले शहरासाठी क्रीडासंकुल मंजूर होऊन पंधरा वर्षे झाली परंतु राजकीय इच्छाशक्तीअभावी क्रीडासंकुल अद्याप पूर्ण झाले नाही. तालुक्यातील पंचतारांकित, लक्ष्मी, शिरोली या तीन औद्योगिक वसाहतींमध्ये प्रमुख समस्या रस्त्यांची असून सत्ताधारी भाजप-शिवसेनेने या समस्येचे निराकरण केले नाही. त्यामुळे दळणवळणाच्या साधनांचा अभाव असल्याने या औद्योगिक वसाहतीत येणारे अनेक उद्योग कर्नाटकात स्थलांतरित होत आहेत.
जिल्ह्यातील सर्वांत महत्त्वाचा प्रश्न पंचगंगा नदीचे प्रदूषण. मात्र, याबाबत ठोस उपाययोजना करण्यात आलेली नाही. महत्त्वाचे म्हणजे कोल्हापूर व इचलकरंजी शहर, लक्ष्मी औद्योगिक वसाहत, पंचतारांकित औद्योगिक वसाहत आदींचे सांडपाणी थेट पंचगंगेत मिसळत असताना अधिकाऱ्यांनी राजकीय हस्तक्षेपाने तोंडी कारवाई करण्यापर्यंत काही केलेले नाही. पंचगंगेच्या काठावरील गावांत सांडपाणी प्रक्रिया प्रकल्प सुरू करण्याच्या फक्त वल्गना झाल्या, पण कारवाई शून्यच. त्याबरोबर पेठवडगाव शहराबाहेरून जाणाऱ्या बायपास रस्त्याचे काम पंधरा वर्षापासून रखडलेले आहे. आदी अनेक महत्वपूर्ण प्रलंबित कामांमुळे तालुक्यातील जनता अक्षरशः मेटाकुटीला आली आहे.