तीन लाखांवर लोक टँकरवर अवलंबून

सांगली : उन्हाळ्याची तीव्रता कमालीची वाढत असताना सांगली जिल्ह्यातील तीन लाखांहून अधिक लोकसंख्येला सध्या टँकरने पाणी पुरवावे लागत आहे. टँकरची संख्या १२५ झाली असून, १२३ गावे व ९२४ वाड्यावस्त्यांना टँकरद्वारे पाणी पुरवठा सुरू आहे.
चारा व पाण्याविना जनावरांचेही हाल सुरू आहेत. पाण्याचा टँकर आल्यावर लोक त्याच्यावर अक्षरश: तुटून पडल्याचे चित्र जत तालुक्यात दिसत आहे.
जत खालोखाल कवठेमहांकाळ, तासगाव, खानापूर, आटपाडी या तालुक्यांतील स्थितीही गंभीर आहे. जिल्ह्यातील मध्यम व लघू पाटबंधारे तलाव कोरडे ठणठणीत पडले आहेत. पाण्याची पातळी इतकी खाली गेली आहे की बोअरवेललाही पाणी लागत नाही. विहिरीदेखील कोरड्या पडल्या आहेत. जत तालुक्यात चारा छावण्या सुरू कराव्यात, अशी मागणी आमदार विलासराव जगताप यांनी केली आहे.
सांगली जिल्ह्यातील पाणी पुरवठा कृष्णा आणि वारणा नद्यांवर अवलंबून आहे. कृष्णा नदी कोरडी पडण्याचे प्रमाणही वाढले आहे. कोयना व वारणा (चांदोली) धरणातून पाणी सोडण्याचे प्रमाणही वाढले आहे. पाटबंधारे विभागातर्फे मधूनमधून उपसाबंदीही लागू करण्यात आली आहे. अजून संपूर्ण मे महिना जाणार आहे. वळीव पावसाचा अद्याप पत्ता नाही. एकसारखा उष्णतेचा पारा वाढत चालला आहे. त्यामुळे शरीराची लाहीलाही होत आहे. उन्हामुळे दुपारी रस्ते, गल्ल्या ओस पडताना दिसत आहेत.

टेंभूचे पाणी पोहोचले
टेंभू योजनेचे पाणी बुधवारी रात्री उशिरा नागज हद्दीत दाखल झाले. म्हैसाळपाठोपाठ टेंभू योजनेचे पाणीही कवठेमहांकाळ तालुक्यात दाखल झाल्याने दुष्काळग्रस्त शेतकऱ्यांना दिलासा मिळाला आहे. नागज ओढ्यातून दुधेभावी तलावात पाणी नेण्यात येणार आहे. यामुळे नागज व ढालगाव भागातील बऱ्याच गावांच्या पिण्याच्या पाण्याचा प्रश्न मार्गी लागणार आहे. टेंभू योजनेच्या मार्गातील शेकडो एकर द्राक्षे, डाळिंबाच्या बागा तसेच अन्य बागायती पिकांना टेंभू योजनेच्या पाण्यामुळे जीवदान मिळणार आहे.