म. टा. प्रतिनिधी, कोल्हापूर
जोतिबा डोंगरावर मोटार पार्क करताना चालकाचा ताबा सुटल्याने कार पाच फुटांवरून खड्ड्यात पडल्याने सात प्रवासी किरकोळ जखमी झाले. रविवारी सायंकाळी साडेसहाच्या सुमारास ही घटना घडली. राजाराम दगडू पाटील (वय ३२), ओंकार संदीप मिरजकर (१५), पूजा संदीप मिरजकर (१२), संगीत संदीप कदम (३५), अनिता संदीप मिरजकर (३२), शोभा शिवाजी गोरुले (३५), शिवाजी गोरुले (३९, सर्व रा. म्हासुर्ली, ता. राधानगरी) अशी जखमींची नावे आहेत.
दख्खनचा राजा जोतिबाच्या खेट्यांना रविवारी सुरुवात झाली. पहाटेपासून दिवसभर जोतिबा डोंगरावर भाविकांनी मोठी गर्दी केली होती. सायंकाळी म्हासुर्ली गावचे गोरुले, पाटील, मिरजकर कुटुबांतील सदस्य टाटा सुमो वाहनाने डोंगरावर आले. वाहन आणि पार्किंग कर पावती केंद्राजवळ कार पार्क करताना चालकाचा ताबा सुटल्याने मोटार उतारावरील खड्ड्यात पडली. परिसरातील नागरिकांनी जखमींना बाहेर काढले. त्यांना सीपीआर रुग्णालयात उपचारास दाखल करण्यात आले.