शिवसेनेने हसं करून घेतलंय, सत्ता कशी सोडणार?

मटा ऑनलाइन वृत्त । कोल्हापूर

शिवसेनेने सरकारविरोधात आंदोलन करून स्वत:चच हसं करून घेतलंय. त्यामुळे ते सत्तेतून बाहेर पडूच शकत नाही, अशी बोचरी टीका भाजपचे ज्येष्ठ नेते, महसूल मंत्री चंद्रकांत पाटील यांनी आज केली.

कोल्हापुरात प्रसारमाध्यमांशी बोलताना चंद्रकांत पाटील यांनी शिवसेनेची जोरदार खिल्ली उडवली. रस्त्यावर उतरून आंदोलन करणाऱ्या शिवसेनेने स्वत:चे हसे करून घेतले आहे. घरातील भांडणं रस्त्यावर काढण्याची वृत्तीच मुळात चुकीची असून शिवसेना सत्तेत राहून विरोधकांची भूमिका घेत स्वत:चे नुकसान करत असल्याची टीका पाटील यांनी केलीय.

शिवसेना कोणत्याही परिस्थितीत सरकारचा पाठिंबा काढूच शकत नाही. ते सत्तेतून बाहेर पडणार नाहीत, असा विश्वासही त्यांनी यावेळी व्यक्त केला. शिवसेनेने महागाईच्या मुद्द्यावरून केंद्र आणि राज्य सरकारला धारेवर धरत मुंबईभर जोरदार आंदोलने केली होती. या आंदोलनात पंतप्रधान नरेंद्र मोदी यांच्यावर व्यक्तिगत टीका करण्यात आली होती. 'मातोश्री'वर झालेल्या शिवसेनेच्या बैठकीत सत्तेतून बाहेर पडण्यावरही चर्चा झाली होती. शिवसेना नेते, खासदार संजय राऊत यांनीही शिवसेना पक्षप्रमुख उद्धव ठाकरे एका निर्णयाप्रत आल्याचं सांगून सत्तेतून बाहेर पडण्याचा भाजपला अप्रत्यक्ष इशाराही दिला होता. तर मराठवाड्यातील काही आमदारांनी मंगळवारी उद्धव यांची भेट घेऊन सत्तेतून बाहेर पडू नका, अशी मागणी केली होती. त्यावर सत्तेतून बाहेर पडण्याचा निर्णय झाला नसल्याची ग्वाही उद्धव यांनी आमदारांना दिली होती. शिवसेनेच्या या धरसोडवृत्तीच्या पार्श्वभूमीवर बोलताना पाटील यांनी हे विधान केलं. विशेष म्हणजे काल दिवसभर दिल्लीत भाजपचे राष्ट्रीय अध्यक्ष अमित शहा यांच्यासह वरिष्ठ नेत्यांच्या गाठीभेटी घेणाऱ्या पाटील यांनी आज शिवसेनेवर बोचरी टीका केल्याने भाजपला शिवसेनेची चिंता नसल्याचंच अधोरेखित होत असल्याचं सुत्रांनी सांगितलं.