अखेर‘ शिवनेरी’ बंद

Sachin.Yadav@timesgroup.com

tweet : @sachinyadavMT

कोल्हापूर : खासगी व्होल्वोपेक्षा जादा दरामुळे प्रवाशांच्या कमी मिळालेल्या प्रतिसादामुळे अखेर कोल्हापूर ते मुंबई शिवनेरी सेवा दोन नोव्हेंबरपासून बंद करण्यात आली. कोल्हापूर विभागाने ही शिवनेरी मुंबई विभागाच्या ताफ्यात सुपूर्द केली. एक ऑक्टोबरला सुरू झालेल्या ही बससेवा प्रवाशांच्या कमी प्रतिसादामुळे बंद करावी लागली. त्यामुळे कोल्हापूर एसटीच्या ताफ्यात आता एसी बस हद्दपार झाली आहे. महिन्याभरात केवळ ३४१ प्रवाशांच्या कोल्हापूर ते मुंबईचा प्रवास केला आहे. कोल्हापूर ते पुणे मार्गावरील शिवनेरी यापूर्वीच बंद झाली आहे.

शिवनेरीत ४५ आरामदायी आसनक्षमता होती. मात्र या शिवनेरीचा तिकीट दर अधिक असल्याने प्रवाशांनीही कमी प्रतिसाद दिला. कोल्हापूर ते मुंबई पर्यंत धावणारी शिवनेरीला जाता-येता प्रवासी मिळाले नाहीत. ३३ दिवसांतच ही सेवा बंद करावी लागली. मुंबई सेंट्रल डेपोतून रात्री अकरा वाजता आणि कोल्हापूरातून रात्री अकरा वाजता मुंबईकडे धावत होती. ३३ दिवसांत केवळ १ लाख ९९ हजार ५०० रुपयांचे उत्पन्न मिळाले आहे. शिवनेरीपेक्षा साधी बससेवेतून दररोज एका फेरीत कोल्हापूर आगाराला १६ हजार रुपयांचे उत्पन्न मिळते. त्यामुळे प्रत्येक दिवशी सरासरी पाच प्रवासी मिळत असल्याने एसटीच्या मुंबई विभागीय कार्यालयाने शिवनेरी सेवा कोल्हापूरला बंद करण्याचा निर्णय घेतला आहे. ही शिवनेरी आता पुणे आगाराला दिली आहे. पुणे ते दादर मार्गावर या शिवनेरी धावणार आहे. खासगी गाड्यांशी स्पर्धेसाठी कोल्हापूर विभागाचे मुंबई कार्यालयाला साकडे घातले होते. १०४३ रुपये आकारला जाणारा तिकीट दर ७५० रुपये करण्याची मागणी केली होती. मात्र शिवनेरीत दिल्या जात असणाऱ्या सुविधांनुसार दर कमी करता येणार नसल्याचे मुंबई विभागीय कार्यालयाकडून कोल्हापूर आगाराला सांगण्यात आले. मुंबई सेंट्रल मार्गांवरुन सर्वांत उशीरा सुटणारी ही बससेवा होती. महालक्ष्मी एक्सप्रेसपेक्षा काही तास अगोदर ही मुंबईत पोहोचत होती. प्रवाशांच्या मागणीनुसार मुंबई सेंट्रलपासून क्रॉफर्ड मार्केट किंवा मंत्रालयापर्यंत फेरी वाढविण्याचा विचार सुरु होता. मात्र ही सेवा बंद झाल्याने पुन्हा निराशच निर्माण झाली आहे.


दरामुळे निराशा

खासगी आराम बसची एसटीसोबत असलेली स्पर्धा, बसस्थानकाच्या आवारात फिरणारे एजंट, जादा फेऱ्या, प्रवासी संख्या यांच्यासह दरातील तफावतमुळे शिवनेरीला कमी प्रतिसाद मिळाला आहे. खासगी व्होल्वो कोल्हापूर ते मुंबईसाठी ५०० ते ७०० रुपये दर आकारतात. त्या तुलनेत एसटीच्या शिवनेरी व्होल्वोचा तिकीट दर १०४३ रुपये होता. हा दर अधिक असल्याने महिन्याभरात जाता आणि येताना केवळ पाचच प्रवासी मिळाले.


शिवनेरीचा दर कमी करण्याची मागणी प्रवाशांच्याकडून सातत्याने केली जात होती. त्याची दखल घेऊन कोल्हापूर विभागाने मुंबई विभागीय कार्यालयाकडे प्रस्ताव दिला होता. मात्र शिवनेरी मुंबईत परत पाठविण्याचे आदेश मिळाले आहेत.

अभय कदम, स्थानकप्रमुख