म. टा. प्रतिनिधी, कोल्हापूर
शहरातील काही ट्राफिक सिग्नल सुरू राहू नयेत यासाठी समाजकंटकांकडून केबल कापून सिग्नल यंत्रणा बंद पाडली जात आहे. यामुळे सार्वजनिक मालमत्तेचे नुकसान होऊन वाहतूक विस्कळीत होत असल्याने दोषींवर गुन्हे दाखल होणार आहेत. याशिवाय सिग्नल दुरुस्तीचा खर्चही वसूल केला जाणार असल्याची माहिती वाहतूक पोलिस निरीक्षक अशोक धुमाळ यांनी दिली.
शहरात वाहतूक कोंडी होऊ नये, यासाठी गर्दीच्या चौकात ट्राफिक सिग्नल कार्यान्वित केले आहेत. स्टेशन रोडवरील कावळा नाका, दाभोळकर कॉर्नर, व्हीनस कॉर्नर, सीपीआर चौक यासह सुभाष रोडवरील फोर्ड कॉर्नर, उमा टॉकीज चौक, हॉकी स्टेडियम तसेच राजारामपुरीतील जनता बजार चौक, आदी ठिकाणी सिग्नल यंत्रणा नियमित सुरू असते. काही ठिकाणी मात्र जाणीवपूर्वक सिग्नल यंत्रणेत बिघाड करण्याचे प्रकार घडत आहेत. लिशां हॉटेल चौक, सायबर चौक, पार्वती टॉकीज चौक, गोखले कॉलेज चौक आणि गंगावेशीतील सिग्नलच्या केबल कापून सिग्नल बंद पाडले जातात. सायबर चौकातील दुरुस्ती करून शुक्रवारी सिग्नल सुरू केला. यानंतर त्याच रात्री अज्ञाताने सिग्नलच्या बॉक्सचे कुलूप तोडून केबल कापल्या आहेत. वाहतूक निरीक्षक अशोक धुमाळ यांनी शनिवारी सकाळी सिग्नलची पाहणी केली. केबल तोडणाऱ्या संशयितांचा शोध सुरू आहे.
चौकांमधील विक्रेते, दुकानदार, अवैध रिक्षा थांब्यांवरील रिक्षाचालक यांच्यासह काही हुल्लडबाजांकडून केबल कापण्याचे प्रकार घडत असल्याची माहिती पोलिसांना मिळाली आहे. संशयितांचा शोध घेण्यासाठी चौकांधील सीसीटीव्ही फुटेज तपासण्याचे काम सुरू आहे. शोध लागताच त्यांच्यावर सार्वजनिक मालमत्तेचे नुकसान केल्याचे फौजदारी गुन्हे दाखल केले जाणार आहेत. याशिवाय त्यांच्याकडून सिग्नल दुरुस्तीचा खर्चही वसूल केला जाईल. सिग्नलमध्ये बिघाड करणाऱ्यांची माहिती असल्यास नागरिकांनी वाहतूक पोलिसांना कळवावे, असे आवाहन वाहतूक निरीक्षक धुमाळ यांनी केले आहे.
०००
सिग्नल तोडणाऱ्यास आठशे रुपये दंड
उमा टॉकीज चौकातून सिग्नल तोडून जाणाऱ्या दुचाकीस्वाराचा वाहतूक निरीक्षक अशोक धुमाळ यांनी शनिवारी पाठलाग केला. पार्वती टॉकीज चौकातही त्याने सिग्नल तोडला. यामुळे धुमाळ यांनी एका दुचाकीवरून त्या तरुणाचा पाठलाग केला. चार सिग्नल तोडून सायबर चौकात पोहोचलेल्या तरुणाला धुमाळ यांनी पकडले. त्याच्याकडून आठशे रुपयांचा दंड वसूल केला. यापुढे सिग्नल तोडणाऱ्यांविरोधात थेट कोर्टात तक्रार दाखल करणार असल्याची माहिती निरीक्षक अशोक धुमाळ यांनी दिली.
००००००००००००००००