प्रा. डॉ. एन. डी. पाटील यांच्या पार्थिवावर शासकीय इतमामात अंत्यसंस्कार!

कोल्हापूर : ‘लाल सलाम-लाल सलाम, भाई एन.डी.पाटील अमर रहे’ अशा घोषणा देत ज्येष्ठ विचारवंत व पुरोगामी चळवळीचे आधारवड प्रा. डॉ. एन.डी. पाटील यांना मंगळवारी साश्रूनयनांनी अखेरचा लाल सलाम करण्यात आला. आयुष्यभर पुरोगामी विचारांवर वाटचाल करणाऱ्या आणि त्यासाठी लढणाऱ्या या नेत्याच्या अंत्यसंस्कारावेळीही कर्मकांडांना फाटा देण्यात आला. करोना संसर्गाच्या पार्श्वभूमीवर मोजक्या लोकांच्या उपस्थितीत आणि शासकीय इतमामात त्यांच्यावर अंत्यसंस्कार करण्यात आले. सर्वसामान्यांसाठी लढणारा आवाज कायमचा शांत झाला.

महाराष्ट्राच्या सामाजिक चळवळींचा आधारवड, कष्टकरी, शेतकरी आणि वंचितांचा बुलंद आवाज असलेल्या प्रा. डॉ. पाटील यांनी सोमवारी जगाचा निरोप घेतला. सकाळी आठ वाजल्यापासून सदर बाजार येथील राजर्षी शाहू कॉलेज येथे त्यांचा पार्थिव अंत्यसंस्कारासाठी ठेवण्यात आलं होतं. यावेळी प्रा. पाटील यांच्या पत्नी सरोज, मेहुणे शरद पवार, चिरंजीव सुहास, प्रशांत, , स्नुषा संगीता, नात रिया, उपमुख्यमंत्री अजित पवार, गृहमंत्री दिलीप वळसे पाटील यांच्यासह अनेक मान्यवर उपस्थित होते.

प्रा. डॉ. पाटील यांच्या पार्थिवाचं अंत्यदर्शन घेताना आणि विचार कार्याला उजाळा देताना सर्वांच्याच डोळयांच्या कडा ओलावल्या. सामाजिक लढे खमकेपणाने लढणाऱ्या पाटील यांना अभिवादन करताना अनेकांच्या भावना दाटून आल्या. सामाजिक आधारवड हरपला अशा शब्दांत मान्यवरांनी अश्रूंना मोकळी वाट करुन दिली.

यावेळी महसूल मंत्री बाळासाहेब थोरात, ग्रामविकास मंत्री हसन मुश्रीफ, सहकार मंत्री बाळासाहेब पाटील, कोल्हापूर जिल्ह्याचे पालकमंत्री सतेज पाटील, जिल्हा परिषद अध्यक्ष राहूल पाटील, राज्य नियोजन मंडळाचे कार्यकारी अध्यक्ष राजेश क्षीरसागर, माजी मुख्यमंत्री आमदार पृथ्वीराज चव्हाण यांनी दिवंगत प्रा. एन. डी. पाटील यांच्या पार्थिवाचे अंत्यदर्शन घेऊन श्रद्धांजली वाहिली. यावेळी खासदार, लोकप्रतिनिधी, शिक्षण, सहकार, सामाजिक क्षेत्रासह विविध क्षेत्रातील मान्यवर, शेतकरी, कामगार, नागरिक यांनीही दिवंगत प्रा.एन.डी. पाटील यांच्या पार्थिवाचे अंत्यदर्शन घेतले.

दरम्यान, दुपारी कसबा बावडा येथील स्मशानभूमीत शासकीय इतमामात प्रा. डॉ. पाटील यांच्यावर अंत्यसंस्कार करण्यात आले. आयुष्यभर त्यांनी पुरोगामी चळवळीत काम केल्याने कर्मकांडांना फाटा देत हे अंत्यसंस्कार झाले. यावेळी ‘लाल सलाम,लाल सलाम, एन. डी. पाटील अमर रहे’ चा जयघोष करण्यात आला. पोलिसांनी बंदुकीच्या तीन फैरी झाडत त्यांना सशस्त्र मानवंदना दिली. सुहास व प्रशांत यांनी भडाग्नी दिला आणि गेली सात दशके महाराष्ट्राच्या राजकीय, सामाजिक, शैक्षणिक क्षेत्रात घोंगावणारं वादळ अखेर अनंतात विलीन झाले. करोना संसर्गाच्या पार्श्वभूमीवर अंत्ययात्रा काढण्यात आली नाही. तरीही त्यांचं पार्थिव स्मशानभूमीत नेताना रस्त्याच्या दुतर्फा थांबलेल्या लोकांनी त्यांना अश्रूपूर्ण नयनांनी श्रद्धांजली वाहिली.