नीलम माणगावे यांच्या कथासंग्रहाला राज्यपुरस्कार

म. टा. प्रतिनिधी, कोल्हापूर

मराठी भाषा विभागाच्यावतीने देण्यात येणाऱ्या ‘स्वर्गीय यशवंतराव चव्हाण राज्य वाङ्मय पुरस्कार २०१६’ची घोषणा सोमवारी झाली. शिक्षण व भाषामंत्री विनोद तावडे यांनी पुरस्कारांची घोषणा केली. जयसिंगपूर येथील लेखिका नीलम माणगावे यांच्या ‘निर्भया लढते आहे’ या कथासंग्रहाला प्रौढ वाङ्मय लघुकथा प्रकारात ‘दिवाकर कृष्ण पुरस्कार’ जाहीर झाला आहे. एक लाख, स्मृतिच‌िन्ह असे पुरस्काराचे स्वरुप आहे.

दरम्यान सृजन प्रकाशन सांगलीतर्फे प्रकाशित सोनाली गावडे यांच्या ‘माझी दैनंदिनी’ या बाल वाङ्मय संकीर्णला व अस्मिता प्रकाशनतर्फे प्रकाशित प्रा. डॉ. जे. एन. गायकवाड यांच्या ‘कथा एका महामानवाची’ या कादंबरीला प्रत्येकी ५० हजार रुपयांचा पुरस्कार जाहीर झाला.

माणगावे यांची ५९ पुस्तके प्रकाशित आहेत. कथा, कविता, कादंबरी, ललित, बालवाङ्मय अशा विविध प्रकारात लेखन केले. ‘जसं घडलं तसं’ हे आत्मकथन प्रकाशित आहे. मुंबई विद्यापीठाच्या बीएभाग दोनच्या अभ्यासक्रमात त्याचा समावेश झाला आहे. ‘निर्भया लढते आहे’ हा कथासंग्रह २०१६ मध्ये प्रकाशित झाला. बलात्कारासारख्या सामाजिक प्रश्नांचा वेध घेत त्यामागील कारणांचा यात शोध घेतला आहे.


स्त्र‌ियांचे जीवन उद्ध्वस्त करणाऱ्या, अतिशय लाजिरवाण्या घटना समाजात घडतात. बलात्कारी कधी सापडतात, कधी सापडत नाहीत याची एक चीड स्त्री म्हणून सतावते. त्याला कथांच्या माध्यमातून मोकळी वाट करुन सामाजिक प्रश्न समाजासमोर मांडण्याचा प्रयत्न केला आहे.

नीलम माणगावे