विमानतळाच्या जागेचा घोळ कायम

Gurubal.Mali@timesgroup.com

Tweet: @gurubalmaliMT

कोल्हापूर: कोल्हापूर विमानतळ विस्तारीकरणासाठी दहा हेक्टर जागा हस्तांतरित करण्यासाठी दिलेला प्रस्ताव वन विभागाने फेटाळून लावला आहे. विमान प्राधिकरणाकडून दिलेल्या प्रस्तावात अनेक त्रुटी असल्याचे सांगितल्याने ‘जागेचा घोळ मिटेना आणि विमान काही उडेना,’ अशी विमानतळाची अवस्था झाली आहे. नव्याने प्रस्ताव पाठवण्याची प्रक्रिया तातडीने सुरू करण्यात येणार असली तरी कागदपत्रांचा घोळ संपत नसल्याने राजकीय नेत्यांचा शब्द मात्र सतत हवेतच विरत आहे.

कोल्हापूर विमानतळावर असलेल्या काही त्रुटींमुळे गेली काही वर्षे विमानसेवा बंद आहे. याचा फटका कोल्हापूरच्या विकासाला बसत आहे. यामुळे ही सेवा सुरू करण्यासाठी राजकीय व प्रशासकीय पातळीवर युद्धपातळीवर प्रयत्न सुरू आहेत. मात्र रोज एका नव्या अडचणीमुळे विस्तारीकरणाचा चेंडू पुढे सरकण्यात अडथळा येत आहे. विमानतळाच्या धावपट्टीसह अन्य कामासाठी २७४ कोटी रुपयांचा निधी लागणार आहे. तो देण्याचे केंद्र सरकारने मान्य केले आहे. त्यात राज्य सरकारही वाटा उचलणार आहे. देशात पन्नास प्रादेशिक विमानतळे तातडीने सुरू करण्याचा निर्णय घेण्यात आला आहे. त्यामध्ये कोल्हापूरचा समावेश आहे.

विमानसेवा सुरू करण्यासाठी कोल्हापूरला प्राधान्य देण्याचे आश्वासन मुख्यमंत्री देवेंद्र फडणवीस यांनी दिल्याने कोल्हापूरकरांच्या अपेक्षा उंचावल्या होत्या. विस्तारीकरणासाठी जादा जागा आवश्यक आहे. या परिसरात वनविभागाची जमीन आहे. ती दहा हेक्टर जागा घेण्याचा निर्णय झाला आहे. गडमुडशिंगी ग्रामपंचायतीने दिलेल्या ठरावामुळे जागा हस्तांरणाला गती आली. यासाठी दोन कोटींचा निधीही वनखात्याकडे वर्ग करण्यात आला आहे.

वनखात्याची जागा वगळून विस्तारीकरणाचा प्रस्ताव देण्यात आला होता. पण ती जागा आवश्यक असल्याने नवा प्रस्ताव तयार करण्यात आला. जागा हस्तांतरणासाठी विमान प्राधिकरणाकडून वन विभागाला प्रस्ताव देण्यात आला. पण तो नागपूर कार्यालयाने पुन्हा फेटाळला आहे. प्रस्तावात त्रुटी दाखवल्या आहेत. त्या दूर करून पुन्हा प्रस्ताव पाठवण्याची सूचना विमान प्राधिकरणाला करण्यात आली आहे. यामुळे मात्र विमानतळ विस्तारीकरण पुन्हा रखडणार आहे.


वनविभागाची जमीन हस्तांतरित करण्यासाठी विमान प्राधिकरणाचा प्रस्ताव आला होता. पण काही त्रुटी असल्याने तो बदलून देण्याची सूचना नागपूर कार्यालयाने केली आहे. नवीन प्रस्ताव येताच तातडीने पुढील प्रक्रिया करण्यात येईल.

रघुनाथ शुक्ला,मुख्य वन संरक्षक