प्रेमी युगुलाचा आत्महत्येचा प्रयत्न

म.टा. वृत्तसेवा,हातकणंगले -

लग्नास विरोध केल्याच्या कारणावरुन हेर्ले (ता. हातकणंगले) येथील अल्पवयीन मुलगी व मोहन सर्जेराव खोत( वय २५) या प्रेमी युगुलाने कीटकनाशक प्राशन करुन आत्महत्या करण्याचा प्रयत्न केला. दोघांचीही प्रकृती गंभीर असून, त्यांच्यावर कोल्हापुरातील सीपीआर रुग्णालयात उपचार सुरू आहेत.

याबाबत अधिक माहिती अशी की, हेर्ले येथील मोहन सर्जेराव खोत हा खासगी कंपनीमध्ये नोकरी करतो. तो गावातील एका अल्पवयीन मुलीवर प्रेम करत होता. या दोघांच्याही कुटुंबियांकडून प्रेमास विरोध होता, तरीही हे दोघे गेले वर्षभर एकमेकांना भेटत होते. कुटुंबियांचा विरोध डावलून या प्रेमी युगुलाने लग्न करण्याचे ठरवले होते. दोघांनी सोमवारी रात्री घरातून पलायन केले, मात्र मुलगीचे वय कमी असल्याने लग्न करता येत नसल्याने आपणास एकमेकांपासून वेगळे होणे दुःखदायक आहे. या नैराश्येच्या भावनेतून दोघांनी ‘नाईकी’ नावाच्या शेतवडीत कीटकनाशक प्राशन करून आत्महत्येचा प्रयत्न केला. मोहन खोत याला खूप त्रास होत असल्याने त्याने आपल्या मित्रास फोन लावून झालेली घटना सांगितली. मित्राने तत्काळ घटनास्थळावर जाऊन अत्यवस्थ अवस्थेतील दोघांना उपचारासाठी कोल्हापुरातील सीपीआरमध्ये दाखल केले. या घटनेची माहिती मिळताच दोघांच्या नातेवाईकांनी सीपीआर परिसरात गर्दी केली होती.

या नैराश्येतून दोघांनी नाईकी नावाच्या शेतवडीत कीटकनाशक प्राशन केले. विष घेतल्यानंतर काही वेळात दोघेही शेतात तडफडू लागले. मोहन खोत यास खूप त्रास होत असल्याने त्याने आपल्या मित्रास फोन लावून आपण विष घेतल्याने सांगितले. मित्र व कुटुंबीयांनी तातडीने शेतात धाव घेतली. दोघांनाही मंगळवारी सकाळी ७ वाजता सीपीआर रुग्णालयात दाखल केले. त्यांच्यावर उपचार सुरू असून दोघेही अत्यवस्थ आहेत. दोघांच्या नातेवाइकांनी सीपीआरमध्ये गर्दी केली होती.