म. टा. वृत्तसेवा, जयसिंगपूर
स्वाइन फ्लूची लागण झाल्याने येथील महिलेचा सांगली येथील खासगी रुग्णालयात उपचारादरम्यान मृत्यू झाला. अश्विनी गुरुनाथ संकपाळ (वय ४४, रा. विद्यासागर अपार्टमेंट, १५ वी गल्ली, जयसिंगपूर) असे त्यांचे नाव आहे. गेल्याच आठवड्यात धरणगुत्ती (ता. शिरोळ) येथील एका तरुणाचा स्वाइन फ्लूने मृत्यू झाला होता. तर उदगाव येथील एका व्यक्तीला स्वाइन फ्लूची लागण झाली. त्यामुळे परिसरात भीतीचे वातावरण आहे.
सात दिवसांपूर्वी अश्विनी संकपाळ यांना सर्दीचा त्रास जाणवू लागला. यानंतर तापही आल्याने शिरोळ येथील रुग्णालयात त्यांनी उपचार घेतले. नंतर त्यांची प्रकृती बिघडली. यामुळे त्या जयसिंगपूर येथील एका खासगी रुग्णालयात दाखल झाल्या. प्रकृती गंभीर असल्याने डॉक्टरांनी त्यांना सांगली येथील रुग्णालयात जाण्यास सांगितले. गेल्या सहा दिवसांपासून त्यांच्यावर येथे उपचार सुरू होते. तपासणी अहवालानंतर त्यांना स्वाइन फ्लू झाल्याचे स्पष्ट झाले. त्यांच्यामध्ये न्यूमोनियाची लक्षणेही आढळली होती. रविवारी सकाळी ११ वाजण्याच्या सुमारास उपचारादरम्यान त्यांचा मृत्यू झाला. त्यांच्या पश्चात पती, मुलगा, मुलगी असा परिवार आहे.
गेल्याच आठवड्यात स्वाइन फ्लूने धरणगुत्ती येथील तरुणाचा मृत्यू झाला होता. यानंतर आता जयसिंगपूरच्या महिलेचा मृत्यू झाल्याने परिसरात भीतीचे वातावरण आहे. उदगाव (ता. शिरोळ) येथील शशिकांत बाजीराव चौगुले (वय ४५) यांनाही स्वाइन फ्लूची लागण झाली आहे. जयसिंगपूर येथील खासगी रुग्णालयांत त्यांच्यावर उपचार सुरू आहेत. सर्दी, ताप, खोकल्याने त्रस्त असल्याने त्यांना रुग्णालयात दाखल करण्यात आले. तपासणी अहवालामध्ये त्यांना स्वाइन फ्लूची लागण झाल्याचे स्पष्ट झाले.
सर्दी, ताप, घशात खवखवणे, घास गिळताना त्रास होणे ही स्वाइन फ्लूची प्राथमिक लक्षणे आहेत. यानंतर रुग्णाला न्युमोनिया होतो. प्राथमिक लक्षणे आढळताच रुग्णांनी तत्काळ प्राथमिक आरोग्य केंद्रात उपचार घ्यावेत. नागरिकांनी गर्दीच्या ठिकाणी जाणे टाळावे.
-एन. एस. चौगुले, वैद्यकीय अधिकारी प्राथमिक आरोग्य केंद्र जयसिंगपूर