म. टा. प्रतिनिधी, कोल्हापूर
महाराष्ट्र-गोवा बार काऊन्सिल निवडणुकीची मतमोजणी पूर्ण झाली असून, त्याचा शनिवारी, २९ जून रोजी जाहीर होणारा निकाल लांबणीवर पडला आहे. काही वादग्रस्त उमेदवारांविरोधात सर्वोच्च न्यायालयात याचिका दाखल झाल्याने निकालाला स्थगिती दिल्याचे समजते. दरम्यान निवडणूक निकाल जाहीर करण्यासाठी अॅडव्होकेट जनरल ऑफ महाराष्ट्राचे आशुतोष कुंभकोणी यांची अध्यक्षपदी नियुक्ती झाली.
महाराष्ट्र-गोवा बार काऊन्सिल निवडणूक रिंगणात राज्यातून १६४ उमेदवार उभे होते. निवडणुकीत कोल्हापुरातून ज्येष्ठ विधिज्ञ अॅड. शिवाजीराव राणे, विवेक घाटगे, किरण पाटील, संपतराव पवार, विनय कदम, विल्सन नाथन, व्ही. बी. चव्हाण, जी. एस. बलुगडे, इंद्र्रजित कांबळे आदी उमेदवार रिंगणात होते. सहा जिल्ह्यांतून १७ उमेदवारांनी निवडणूक लढविली. ५ मे २०१८ पासून जिल्हानिहाय मतमोजणीस सुरुवात झाली होती. मतमोजणीला दहा महिन्यांचा कालावधी लागला. सध्या मतमोजणी प्रक्रिया पूर्ण झाली आहे. निकाल जाहीर करण्यासाठी अॅडव्होकेट जनरल ऑफ महाराष्ट्रचे आशुतोष कुंभकोणी यांची अध्यक्षपदी नियुक्ती केली आहे. ते शनिवारी कोल्हापूर जिल्हा बार असोसिएशनच्या समुपदेशन केंद्राच्या उद्घाटनासाठी येणार होते. परंतु, त्यांच्यावर निकालाची जबाबदारी असल्याने ते येऊ शकले नाहीत. शनिवारी सायंकाळी साडेपाचपर्यंत हा निकाल अपेक्षित होता; मात्र तो लांबणीवर पडल्याचे सूत्रांनी सांगितले.