म. टा. प्रतिनिधी, कोल्हापूर
अटल विश्वकर्मा सन्मान योजनेंतर्गत इमारत व इतर बांधकाम कामगार नोंदणीची प्रक्रिया सुरू झाली आहे. जिल्ह्यात २५ हजार कामगार नोंदणीचे उद्दिष्ट आहे. मात्र त्यापेक्षा अधिक कामगारांची नोंदणी करण्यात येणार आहे, अशी माहिती निवासी उपजिल्हाधिकारी संजय शिंदे यांनी प्रसिध्दी पत्रकातून दिली.
कामगारमंत्री संभाजी पाटील - निलंगेकर, उर्जामंत्री चंद्रशेखर बावनकुळे, सामाजिक न्यायमंत्री राजकुमार बडोले यांच्या उपस्थितीत नागपूर येथून योजनेचा इ-शुभारंभ बुधवारी झाला. त्यानंतर झालेल्या व्हिडिओ कॉन्फरन्सव्दारे माहिती देण्यात आली. त्यानंतर प्रातिनिधी स्वरूपात निवासी उपजिल्हाधिकारी शिंदे यांच्या हस्ते काही कामगारांना ओळखपत्रांचे वाटप करण्यात आले. यावेळी सहाय्यक कामगार आयुक्त अनिल गुरव, कामगार अधिकारी यशवंत हुंबे, राहुल तोडकर, चंद्रकांत पोवार, नरोत्तम लाटा, पराग जोशी आदी उपस्थित होते.
----------------------------