शिवाजी बँकेच्या संचालकांवर
चार कोटीची जबाबदारी
म. टा. प्रतिनिधी, कोल्हापूर
गडहिंग्लज येथील शिवाजी सहकारी बँकेचे आर्थिक नुकसान केल्याप्रकरणी सोळा संचालकांसह व्यस्थापक व शाखाधिकाऱ्यांना दोषी ठरवण्यात आले . दोषी संचालकांवर महाराष्ट्र सहकारी संस्था अधिनियम १९६० च्या कलम ८८ व नियम ७२ अन्वये चार कोटी २७ लाख ५५ हजार ३९२ रुपयांची जबाबदारी निश्चित केली आहे. याबाबतचा चौकशी अहवाल प्राधिकृत अधिकारी तथा करवीरचे निबंधक सुनील धायगुडे यांनी जिल्हा उपनिबंधक अरुण काकडे यांच्याकडे सादर केला. अवसायनात असलेल्या शिवाजी बँकेचे संचालक चौकशीत दोषी आढल्याने सहकार विभागात एकच खळबळ उडाली आहे.
शिवाजी बँकेची २००७ पासून २०१२ पर्यंत संचालक मंडळांने आर्थिक नुकसान केल्याची तक्रार सहकार विभागाकडे दाखल झाली होती. तक्रारीची दखल घेत जिल्हा उपनिबंधक काकडे यांनी प्राधिकृत अधिकारी म्हणून धायगुडे यांची नियुक्ती केली होती. धायगुडे शिवाजी बँकेच्या सर्व संचालकांना आर्थिक नुकसानीस जबाबदार ठरवले आहे. जबाबदारी निश्चित केलेली रक्कम अहवाल दिल्यापासून ३० दिवसाच्या आत बँकेच्या खात्यावर जमा करावी लागणार आहे. जबाबदारी निश्चितीतील रक्कम न भरल्यास महाराष्ट्र सहकारी संस्था अधिनियम १९६० च्या कलम ९८ नुसार लेखापरिक्षणाच्या तारखेपासून १५ टक्के व्याजाने वसूल करण्याचा इशारा दिला आहे. दोषी ठरलेल्या संचालकांमध्ये तानाजीराव मोहिते, प्रकाशराव चव्हाण, किसनराव कुऱ्हाडे, किरण कदम, प्रमोद रणनवरे, चंद्रकांत कांबळे, संजय मोकाशी, विष्णुपंत शिंदे, विजयसिंह नलावडे, विजयमाला रणनवरे, उदय कदम, संग्रामसिंह घाटगे, निशिकांत चोथे, दिपकराव जाधव, दत्ताजीराव देसाई, नंदप्रभा चव्हाण यांच्यासह व्यवस्थापक सुधीर देसाई, शाखाधिकारी सुधाकर देसाई यांचा समावेश होता.