कडकनाथ कोंबडी प्रकरण
म. टा. प्रतिनिधी, कोल्हापूर
शेतकऱ्यांची कोट्यावधी रुपयांची फसवणूक करणाऱ्या इस्लामपूर येथील महारयत अॅग्रो लि. कंपनीचे स्टेशन रोडवरील कार्यालय शाहूपुरी पोलिसांनी शुक्रवारी दुपारी दोन वाजता सील केले. कार्यालयातील महत्त्वाची कागदपत्रे जप्त करुन येथील व्यवस्थापक आणि कर्मचाऱ्यांना या फसवणूक गुन्ह्यात साक्षीदार केले आहे. कार्यालयाचा सुमारे पाच तास पंचनामा सुरु होता.
या प्रकरणी गुरुवारी विजय विलास आमते (वय ३९, रा. दत्त कॉलनी, सांगावकर मळा, शिंगणापूर, ता. करवीर) यांनी तक्रार दाखल केली होती. त्यानुसार 'कडकनाथ' कोंबडी पालन व्यवसायातील गैरव्यवहारप्रकरणी 'महारयत अॅग्रो'च्या संचालकांविरोधात गुन्हा दाखल झाला आहे. कोल्हापुरात सुमारे ३ कोटी ९४ लाख ५९ हजार ९३० रुपये फसवणूक केल्याबद्दल संशयित सुधीर शंकर मोहिते, संदीप सुभाष मोहिते (दोघे रा. इस्लामपूर, ता. वाळवा, जि. सांगली) आणि अन्य संचालकांवर गुन्हा दाखल झाला आहे.
कंपनीने थोरली मशिद इमारतीच्या तिसऱ्या मजल्यावर अडीचशे चौरस फुटाचा गाळा कार्यालयासाठी भाडेतत्त्वावर घेतला होता. या कार्यालयातूनच कोंबडी पालन व्यवसायाचे आमिष दाखवून लोकांककडून कोट्यावधी रुपये जमा केले. दरम्यान शुक्रवारी पोलिसांनी या कार्यालयाचा पंचनामा केला. तपास अधिकारी पोलिस उपनिरीक्षक पवन मोरे यांनी सहकार्यांसमवेत कारवाई केली. गुंतवणूकदारांना दिले जाणारे फॉर्म, नोंदवही, फाईल्स, शिक्के, लेटरपॅड पोलिसांनी जप्त केले. येथील व्यवस्थापक आणि कर्मचाऱ्यांचे जबाब घेऊन त्यांना साक्षीदार केले आहे. दरम्यान, यापुढे तक्रार दाखल करणाऱ्या तक्रारदारांना साक्षीदार केले जाणार आहे. गुन्हा दाखल झाल्यापासून संशयित पसार झाले असून मोबाइलही बंद असल्याचे पोलिसांनी सांगितले.
०० ० ०