म. टा. प्रतिनिधी, कोल्हापूर
केशवराव भोसले नाट्यगृह नूतनीकरणाच्या दुसऱ्या टप्प्यातील विकासकामांचा नऊ कोटी ९३ लाख रुपयांचा सुधारित आराखडा अंतिम मंजुरीसाठी पंधरा दिवसांत सरकारकडे पाठवला जाणार आहे. बुधवारी जिल्हाधिकारी कार्यालयात झालेल्या आढावा बैठकीमध्ये विभागीय आयुक्त डॉ. दीपक म्हैसेकर यांनी प्रस्तावाबाबत काही सूचनाही केल्या. विभागीय आयुक्तांच्या सकारात्मक भूमिकेमुळे नाट्यगृहाच्या परिसरातील उर्वरित नूतनीकरणाच्या कामाला लवकर सुरुवात होऊ शकते.
नाट्यगृहाचे नूतनीकरण व शाहू खासबाग मैदानासाठी दहा कोटी रुपयांचा निधी मंजूर केला होता. या प्रमुख विकासकामानंतर दुसऱ्या टप्प्यातील कामे हाती घेण्यात येणार होती. त्यासाठीचा प्रस्ताव तयार करण्यात आला होता. दरम्यानच्या कालावधीत जीएसटी लागू केल्यानंतर त्याचा भार पडणार होता. त्यामुळे हा प्रस्ताव रखडला होता. त्याबाबत जिल्हाधिकारी पातळीवर चर्चा होऊन जीएसटीसह प्रस्ताव देण्याच्या सूचना केल्या होत्या. त्यानुसार नऊ कोटी ९३ लाख रुपयांचा प्रस्ताव तयार करण्यात आला. गेल्या आठवड्यातच महापालिकेच्या वतीने विभागीय आयुक्तांसमोर या प्रस्तावाचे सादरीकरण केले होते. त्यावेळीच विभागीय आयुक्तांच्या पातळीवरील हिरवा कंदील दाखविण्यात आला होता. बुधवारी जिल्हाधिकारी कार्यालयात झालेल्या आढावा बैठकीत तो प्रस्ताव तातडीने पाठविण्यात यावा. अंतिम मंजुरीसाठी पंधरा दिवसांच्या आत तो सरकारकडे पाठवला जाईल, असे विभागीय आयुक्त डॉ. म्हैसेकर यांनी स्पष्ट केले.
या प्रस्तावानुसार ब्लॅक बॉक्स, संरक्षक भिंत, पार्किंग, खाऊगल्लीचा विकास, लँडस्केप अशी कामे करण्यात येणार आहेत. नाट्यगृह, खासबाग मैदान या ऐतिहासिक वास्तूंचा विचार करून हेरिटेजच्या धर्तीवर उर्वरित विकासकामे करण्यात येणार आहेत. त्यादृष्टीने आराखडा बनविण्यात आला आहे.
०००००