आठ लाखांच्या चोरीचा छडा

म.टा.वृत्तसेवा,इचलकरंजी -

येथील महालक्ष्मीनगरमधील गेस्ट हाऊसमध्ये झालेल्या आठ लाखांच्या चोरीचा छडा लावण्यात गावभाग पोलिसांना यश आले आहे. पोलिसांनी पप्पू उर्फ रविदास रामचंद्रदास (वय २६) याला झारखंड येथून जेरबंद केले. त्याच्याकडून सात लाख ६७ हजाराची रोकड हस्तगत केली असल्याची माहिती पोलिस उपअधिक्षक विनायक नरळे यांनी पत्रकारांना दिली.

दरम्यान, कामापोटी मिळणारा पगार अत्यल्प असताना अन्य लोकांचा पगार वाढत असल्याने ही चोरी केली असल्याची कबुली रविदास याने दिली आहे.

शिवनाकवाडी (ता. शिरोळ) येथील सैनिक फुड प्रायव्हेट लि; या कंपनीकडून साखर कारखान्यांकडून साखर खरेदी करुन ती मेघालय सरकारच्या नागरी आपूर्ती निगम विभागामध्ये पुरवठा करीत असते. या कंपनीचे महालक्ष्मीनगर येथे गेस्ट हाऊस असून याठिकाणी सुपरवायझर राजीव राणा व अकौटंट सौरभ निर्मलकर हे राहण्यास आहेत.तीन जून रोजी या दोघांनीही प्रत्येकी तीन लाख रुपये व कंपनीकडून इतर खर्चासाठी ठेवलेले दोन लाख रुपये आणि अडीच तोळे वजनाची चेन आणि अंगठी असा आठ लाख ३९ हजार ५०० रुपयांचा मुद्देमाल चोरीस गेला होता. या कंपनीतील आचारी पप्पू उर्फ रविदास रामचंद्रदास हा सदरचा मुद्देमाल घेऊन पळून गेला होता. पोलिसांच्या विविध पथकाद्वारे त्याचा शोध सुरु होता. मोबाइल लोकेशनवरुन तो औरंगाबाद व त्यानंतर झारखंड राज्यातील त्याच्या गर्डी या गावात असल्याचे निष्पन्न झाले होते. नक्षलग्रस्त भाग असल्याने स्थानिक पोलिसांच्या मदतीने गावभाग पोलिसांनी मोठ्या धाडसाने पप्पू याला गजाआड केले. त्याच्याकडे चौकशी करता त्याने चोरीची रक्कम महालक्ष्मीनगर येथील गेस्ट हाऊसच्या इमारतीच्या टेरेसवर लपविली असल्याचे सांगितले. चोरलेल्या रकमेपैकी काही रक्कम त्याने खर्च केली. तर उर्वरीत सात लाख ६७ हजाराची रोकड व चोरीच्या पैशातून खरेदी केलेला मोबाईल व कपडे त्याच्याकडून जप्त करण्यात आले आहेत.