विकास योजनांचा
आज लेखाजोखा
विभागीय आयुक्तांच्या उपस्थितीत अधिकाऱ्यांच्या बैठका
म. टा. प्रतिनिधी, कोल्हापूर
पंचगंगा नदी प्रदूषण, डेंगीची वाढती तीव्रता, विभागीय क्रीडा संकुलाचे रखडलेले काम यापासून अंबाबाई मंदिर तीर्थक्षेत्र विकास आराखडा अशा विविध घटकांचा आणि विकास योजनांचा लेखाजोखा बुधवारी मांडला जाईल. विभागीय आयुक्त दीपक म्हैसेकर यांच्या प्रमुख उपस्थितीत बुधवारी (ता. ११) जिल्हाधिकारी कार्यालय आणि जिल्हा परिषदेत स्वतंत्र बैठका होणार आहेत. तत्पूर्वी म्हैसेकर हे गुरुवारी सकाळी नऊ वाजण्याच्या सुमारास दुधाळी एसटीपी, जयंती नाला पंपिंग स्टेशन, विभागीय क्रीडा संकुल येथे भेट देणार आहेत. विभागीय आयुक्तांच्या दौऱ्याच्या पार्श्वभूमीवर प्रशासकीय यंत्रणा गतिमान झाली आहे.
जिल्हाधिकारी कार्यालय येथे सकाळी १०.३० वाजण्याच्या सुमारास बैठक होणार आहे. त्यामध्ये पंचगंगा नदी प्रदूषणप्रश्नी चर्चा होणार आहे. प्रशासकीय अधिकारी, महाराष्ट्र प्रदूषण नियत्रंण मंडळाचे अधिकारी, इंडस्ट्रीजचे प्रतिनिधी अशी संयुक्त बैठक होणार आहे. नदीचे प्रदूषण रोखण्यासाठी प्रशासनाकडून केलेल्या उपाययोजना, सद्यस्थितीविषयी चर्चा होईल. याप्रसंगी अंबाबाई मंदिराच्या विकास आराखड्याचे सादरीकरण होण्याची शक्यता आहे. दुपारी २.३० वाजता जिल्हा परिषदेत आढावा बैठक होईल. विभागीय आयुक्तांच्या दौऱ्याच्या पार्श्वभूमीवर जिल्हा परिषदेचे मुख्य कार्यकारी अधिकारी कुणाल खेमनार यांनी मंगळवारी विभागप्रमुखांची बैठक घेतली. शालेय पोषण आहार, सर्वशिक्षा अभियान, जिल्हा ग्रामीण विकास प्रकल्प यंत्रणा यांसह ग्रामपंचात विभागाच्या योजनांचा आढावा घेतला.