नांदणीत विहीरीत बुडूनपाणबुड्यासह दोघांचा मृत्यू

,जयसिंगपूर

नांदणी (ता.शिरोळ) येथे विहीरीत पोहण्यासाठी गेलेल्या मुलाचा बुडाल्याने मृत्यू झाला. यानंतर बुडालेल्या मुलाचा मृतदेह बाहेर काढण्यासाठी आलेल्या पाणबुड्यावरही काळाने घाला घातला. रविवारी दुपारी ही दुर्दैवी घटना घडली. सुयश रविंद्र हातगिणे (वय १५, रा.नांदणी), संतोष उर्फ प्रदीप शिवाजी झुटाळ (वय ४०, रा.टाकवडे) अशी मृतांची नावे आहेत.

याबाबत शिरोळ पोलिसांतून तसेच घटनास्थळावरून मिळालेली अधिक माहिती अशी, दुपारी एक वाजण्याच्या सुमारास सुयश हा नांदणी येथील धरणगुत्ती रस्त्यावरील देस्कत मळ्यातील आर.एस.पाटील यांच्या विहीरीत मित्रासमवेत पोहण्यासाठी गेला होता. यावेळी पोहत असताना सुयश पाण्यात बुडाला. दरम्यान, या घटनेचे वृत्त परिसरात वाऱ्यासारखे पसरले. ग्रामस्थांनी घटनास्थळाकडे धाव घेतली. काही तरूणांनी विहीरीत सुयशचा शोध घेतला मात्र तो सापडला नाही.

दरम्यान, यानंतर टाकवडे (ता.शिरोळ) येथील संतोष उर्फ प्रदीप शिवाजी झुटाळ या पाणबुड्यास सुयशचा शोध घेण्यासाठी बोलाविण्यात आले. संतोष दुपारी साडेतीन वाजण्याच्या सुमारास विहीरीत उतरला. दोन प्रयत्न अयशस्वी झाल्यानंतर संतोष पुन्हा सुयशचा शोध घेण्यासाठी पाण्यात बुडाला आणि सुयशचा मृतदेह घेवून वर आला. याच दरम्यान संतोषचा श्वास गुदमरल्याने तो पाण्यात बुडाला. रात्री उशिरापर्यंत त्याच्या मृतदेहाचे शोधकार्य सुरू होते. या घटनेची नोंद शिरोळ पोलिसात झाली आहे.