इचलकरंजीत प्रचारावरुनदोन गटात हाणामारी

इचलकरंजी

निवडणूक प्रचाराच्या कारणावरुन येथील तांबेमाळ परिसरात काँग्रेस आणि ताराराणी आघाडी समर्थकांमध्ये जोरदार हाणामारीसह उमेदवाराच्या घरावर दगफेक करण्यात आली. या प्रकाराने तांबेमाळ परिसरात तणावपूर्ण वातावरण आहे. याप्रकरणी शिवाजीनगर पोलिस ठाण्यात परस्पर विरोधी फिर्यादी दाखल झाल्या असून दोन्ही गटातील १० जणांविरोधात गुन्हा दाखल करण्यात आला आहे.

नगरपालिका सार्वत्रिक निवडणुकीसाठी प्रभाग क्रमांक २९ मध्ये प्रचार सुरू होता. याठिकाणी कॉंग्रेस पक्षाकडून बंडोपंत लाड तर ताराराणी आघाडीकडून राजवर्धन नाईक हे निवडणूक लढवत आहेत. दुपारी या दोन्ही उमेदवारांच्या समर्थकांत जोरदार वाद होऊन वादाचे पर्यावसान हाणामारीत झाले. त्यावेळी संतप्त जमावाने लाड यांच्या घरावर जोरदार दगडफेक करत काचा फोडल्या. तर लाड समर्थकांनी नाईक समर्थकांना प्रचार करताना रोखून मारहाण केली. दोन्ही गटाचे समर्थक समोरासमोर आल्याने परिसरात तणाव निर्माण झाला होता. घटनेची माहिती मिळताच पोलिसांनी धाव घेत जमावाला पांगविले. या प्रकारानंतर दोन्ही गटातील नेतेमंडळी आणि समर्थकांनी शिवाजीनगर पोलिस ठाण्याच्या आवारात गर्दी केली होती. सायंकाळी उशिरा याबाबत परस्पर विरोधी फिर्यादी शिवाजीनगर पोलीस ठाण्यात दाखल झाल्या. लाड यांनी दिलेल्या तक्रारीत संभाजी नाईक, धनाजी नाईक, राजवर्धन नाईक, सागर चाळके आणि घुणके जॉबर यांनी घरावर दगडफेक केल्याचे आणि अन्य 7-8 कार्यकर्त्यांनी कुटुंबियांना मारहाण केल्याचे म्हटले आहे. तर नाईक समर्थक शिवानंद घुणके, रेणुका मांगले यांनी दिलेल्या तक्रारीत रमेश लाड, बंडोपंत लाड, विजय लाड यांनी शिवीगाळ करून मारहाण केल्याचे नमूद केले आहे. या तक्रारींवरुन पोलिसांनी दोन्ही गटातील सुमारे १० जणांवर गुन्हे दाखल केले असून तांबेमाळ परिसरात मोठा बंदोबस्त तैनात करण्यात आला आहे