म. टा. प्रतिनिधी, कोल्हापूर
कौटुंबिक वादातून पतीने पत्नीच्या डोक्यात फरशीच्या तुकड्याने मारहाण केल्याने पत्नी गंभीर जखमी झाली. लक्ष्मी युवराज मांडे (वय ३०, रा. सध्या रा. जवाहरनगर, मूळ रा. उदगाव, ता. शिरोळ) असे जखमी पत्नीचे नाव आहे. हा प्रकार रविवारी (ता. १५) दुपारी बाराच्या सुमारास शाहूनगरातील चांदीच्या गणपती मंदिरासमोर घडला. याबाबत पती युवराज आनंद मांडे (४०, रा. कोरोची, ता. हातकणंगले) याच्यावर राजारामपुरी पोलिस ठाण्यात फिर्याद दाखल झाली. पतीचे व्यसन आणि कौटुंबिक वादामुळे लक्ष्मी मांडे या गेल्या काही महिन्यांपासून दोन मुलांसह जवाहरनगर येथे राहत आहेत. पती युवराज हा रविवारी दुपारी मुलांना भेटण्यासाठी जवाहरनगरात आला होता. मुलांना भेटण्याच्या कारणावरून दोघांमध्ये वाद झाला. यावेळी चिडलेल्या पतीने लक्ष्मी यांच्या डोक्यात फरशीचा तुकडा मारल्याने त्या गंभीर जखमी झाल्या. परिसरातील नागरिकांनी त्यांना उपचारासाठी सीपीआरमध्ये दाखल केले. राजारामपुरी पोलिस ठाण्यात फिर्याद दाखल झाली असून पोलिसांकडून हल्लेखोराचा शोध सुरू आहे.