म. टा. प्रतिनिधी, कोल्हापूर
आंतरराष्ट्रीय कीर्तीचे योगतज्ज्ञ आणि ज्येष्ठ ऑर्थोपेडिक सर्जन डॉ. धनंजय गुंडे (वय ८२) यांचे बुधवारी सकाळी हृदयविकाराने निधन झाले. डॉ. गुंडे कल्पेट (केरळ) येथील त्यांची कन्या कविता श्रेयांसकुमार यांच्याकडे पत्नीसह गेले होते. नेहमीप्रमाणे मॉर्निंग वॉक करुन घरी परतल्यानंतर त्यांना अस्वस्थ वाटू लागले. त्यावेळी हृदयविकाराचा तीव्र झटक्याने त्यांचे निधन झाले. त्यांच्या निधनाचे वृत्त समजताच योग व हास्य परिवाराबरोबरच सर्वत्र शोककळा पसरली.
सायंकाळी एअर अॅम्ब्युलन्सने त्यांचे पार्थिव कोल्हापुरात आणण्यात आले. गुरुवारी सकाळी दहा वाजता पंचगंगा स्मशानभूमी येथे अंत्यसंस्कार करण्यात येणार आहेत.
डॉ. गुंडे यांची गुडघ्यावरील स्टेम सेल प्रत्यारोपण शल्य चिकित्सक म्हणून ओळख होती. १९६६ पासून ते अस्थिरोगविषयक सल्लागार म्हणून कार्यरत होते. वैद्यकीय आणि सामाजिक क्षेत्रात ते आयुष्यभर कार्यरत राहिले. योगविद्येचा प्रसार आणि प्रचारात त्यांचे मोठे योगदान होते. जीजेजी योग अकॅडमीच्या माध्यमातून त्यांनी योगविद्या आणि निरोगी आयुष्याचा मंत्र अनेकांना दिला. योग प्रसारासाठी देशभरात त्यांनी ९०० हून तर परदेशात दीडशेवर शिबिरे घेतली होती. या विषयावरील त्यांची पुस्तकेही मार्गदर्शक ठरली.
योगक्षेत्रातील सेवाभावी कार्याबद्दल त्यांचा विविध सामाजिक संस्था आणि संघटनांकडून विविध पुरस्कारांनी गौरव करण्यात आला आहे. कोल्हापूर महापालिकेने कोल्हापूर भूषण पुरस्कार देऊन त्यांना सन्मानित केले आहे. दक्षिण भारत जैन सभेच्या वीर सेवा दल युवक शाखेचे संस्थापक अध्यक्ष अध्यक्ष म्हणूनही त्यांनी प्रभावी कामगिरी केली. मित्रपरिवारात 'आप्पा' म्हणून ते परिचित होते. त्यांच्या पश्चात पत्नी ललिता, कविता आणि सुचेता या दोन मुली, जावई आणि नातवंडे असा परिवार आहे.
आज अंत्यसंस्कार
एअर अॅम्ब्युलन्सद्वारे डॉ. गुंडे यांचे पार्थिव बुधवारी सायंकाळी कोल्हापुरात आणण्यात आले. त्यांच्या पार्थिवाच्या दर्शनासाठी नातेवाईक आणि मित्रपरिवारांनी गर्दी केली होती. दरम्यान, शिवाजी पार्क येथील कृष्णा या निवासस्थानी गुरुवारी सकाळी सात ते नऊ या वेळेत पार्थिव अंत्यदर्शनासाठी ठेवण्यात येणार आहे. सकाळी दहा वाजता पंचगंगा स्मशानभूमी येथे अंत्यसंस्कार करण्यात येणार आहेत.
०००००००००००००००००