दुर्दैवी! लग्नाच्या तोंडावर नवरदेवाचा मृत्यू; दीड वर्षात कुटुंबातले तीन आधारस्तंभ कोसळले

कोल्हापूर: पन्हाळा येथील योगेश चंद्रकांत सणगर (वय २७) या युवकाचा बोहल्यावर चढण्याआधीच हृदयविकाराच्या तीव्र झटक्याने आज मृत्यू झाला. त्याचे येत्या शुक्रवारी लग्न होते. त्याच्या लहान भावाचे आठ महिन्यांपूर्वी हृदयविकाराच्या झटक्याने तर वडिलांचे दीड वर्षांपूर्वा कॅन्सरने निधन झाले होते. अवघ्या दीड वर्षात अख्खे कुटुंब उद्ध्वस्त झाल्याने परिसरात हळहळ व्यक्त होत आहे

योगेशचे लग्न ठरले होते. येत्या शुक्रवारी तो बोहल्यावर चढणार होता. घरात लग्नाची घाई गडबड सुरु असताना त्याच्या छातीत आज सकाळी दुखू लागले. त्याला तातडीने कोडोली येथील खाजगी दवाखान्यात उपचारासाठी दाखल करण्यात आले. उपचार सुरु असतानाच पुन्हा एकदा हृदयविकाराचा तीव्र झटका आल्याने योगेशची प्राणज्योत मालवली. योगेश शांत स्वभावाचा होता. तो महावितरणमध्ये कामाला होता.
VIDEO: रस्त्याचा अंदाज न आल्यानं कार थेट दुधगंगा नदीत शिरली अन् मग...
योगेशचा लहान भाऊ निलेश सणगर हा इंजिनिअर होता. त्याचाही आठ महिन्यांपूर्वी हृदयविकाराच्या झटक्याने मृत्यू झाला होता. तर वडील चंद्रकांत सणगर हे शासकीय आयटीआय सेवेत होते. त्यांचे दीड वर्षांपूर्वी पूर्वी कॅन्सरने निधन झाले होते. वडिलांपाठोपाठ लहान भावाचे निधन झाल्याने योगेशवर घरची सर्व जबाबदारी पडली होती. पुढच्या आठवड्यात योगेशचे लग्न होते. पण बोहल्यावर चढण्याआधीच त्याचा हृदयविकाराच्या झटक्याने मृत्यू झाला. दीड वर्षात अख्खे कुटुंब उद्ध्वस्त झाल्याने माले आणि परिसरात हळहळ व्यक्त होत आहे. योगेशच्या पश्चात आई, दोन विवाहित बहिणी असा परिवार आहे.