म. टा. प्रतिनिधी, कोल्हापूर
राज्य सरकारच्या यशवंत पंचायत राज अभियानांतर्गत कोल्हापूर जिल्हा परिषद, गडहिंग्लज व राधानगरी पंचायत समितीची तपासणी बुधवारी (ता.१२) होणार आहे. सांगली जिल्हा परिषदेतील अतिरिक्त मुख्य कार्यकारी अधिकारी व सामान्य प्रशासन विभागाचे उपमुख्य कार्यकारी अधिकारी यांच्या समितीमार्फत विभागीय तपासणी होणार आहे. दरम्यान, पंचायत राज अभियानमध्ये कोल्हापूर जिल्हा परिषद पुणे विभागात प्रथम स्थानी आहे.
जिल्हा परिषद स्तरावर कोल्हापूर जिल्हा परिषदेला २६३.८१, सोलापूर जिल्हा परिषदेला २५८.१३ गुण मिळाले आहेत. गडहिंग्लज पंचायत समितीला २७०.७७, राधानगरी पंचायत समितीला २४८.५५ गुण मिळाले आहेत. पंचायत राज अभियानाच्या तपासणी दौऱ्याच्या निमित्ताने प्रशासकीय यंत्रणा सक्रिय झाली आहे. अधिकाऱ्यांना दौऱ्याच्या पार्श्वभूमीवर सूचना केल्या आहेत. तपासणी समिती जिल्हा परिषद मुख्यालय व दोन्ही पंचायत समित्यांना भेटी देऊन कागदपत्रांची तपासणी, अधिकाऱ्यांशी चर्चा करणार आहे. तपासणीचा अहवाल १४ जूनपर्यंत विभागीय आयुक्त कार्यालयाकडे जमा करावयाचा आहे.
दरम्यान, सांगली जिल्ह्यातील कडेगाव, शिराळा पंचायत समित्या व सातारा जिल्ह्यातील कोरेगाव आणि सातारा पंचायत समित्यांची तपासणी होणार आहे. सातारा जिल्हा तपासणी समितीत सोलापूर जिल्हा परिषदेच्या अधिकाऱ्यांचा समावेश आहे, तर सातारा जिल्हा परिषदेमधील अधिकारी सांगलीसाठी तपासणी अधिकारी आहेत. जिल्हा स्तरावर कडेगाव पंचायत समितीला २६७.२७ तर शिराळा पंचायत समितीला २४८.५८ गुण मिळाले आहेत.
०००००