लातूर मनपा अॅक्शन मोडमध्ये, गंजगोलाईतील दुकानं केली सील

लातूर : थकीत कराचा भरणा करावा यासाठी अनेकदा नोटीसा देऊन सुध्दा कर भरणा न केल्याने लातूर शहर महानगरपालिका आता थकबाकीदारांविरोधात अॅक्शन मोडमध्ये आली आहे. आज महानगपालिकेच्या क्षेत्रीय अधिकाऱ्यांनी शहरातील मुख्य बाजारपेठेतील कराची थकबाकी असलेली दुकाने सील केली आहेत.

लातूर महानगरपालिकाने थकीत कराचा भरणा करावा यासाठी अनेकदा थकबाकीदारांना नोटीसा दिल्या परंतु अनेकांनी कर भरणा केला नाही. त्यामुळे आज महापालिकेच्या अधिकाऱ्यांनी शहरातील गंजगोलाईतील दुकान सील केली.

मालमत्ता कर, वृक्ष कर, शिक्षण कर, अग्निशमन कर अशा विविध करापोटी 100 कोटी रुपयांपेक्षा जास्त थकबाकी असून वसूल होत नाही. यामुळे महानगरपालिका आर्थिक अडचणीत सापडली आहे. थकीत कर वसुलीसाठी मनपा आता अॅक्शन मोडमध्ये आली असून थकबाकीदार नागरिकांनी कराचा भरणा करावा, असं आवाहन महापालिकेच्या वतीने करण्यात आलं आहे.

'लातूर महापालिकेचं रणांगण'

कोरोना आणि ओमिक्रॉनचा प्रादुर्भाव वाढत असताना राज्यातील महापालिका, नगरपरिषदा आणि ग्रामपंचायतीच्या निवडणुकाही पुढे ढकलल्या जाण्याची शक्यता आहे. नुकत्याच पार पडलेल्या विधानसभा अधिवेशनातही त्याबाबतची चर्चा झाली. लातूर महापालिकेची 21 मे 2022 रोजी मुदत संपत आहे.