लातूर अंबाजोगाई रस्त्यावर भीषण अपघात, १ ठार, तब्बल १९ जण जखमी

लातूर : अंबाजोगाई-लातूर रस्त्यावर सायगाव जवळ शनिवारी दि. १९ फेब्रुवारी रोजी पहाटे दीडच्या सुमारास भीषण अपघात झाला. रस्त्याच्या बाजूला उभ्या असलेल्या पिकअपला भरधाव वेगात असलेल्या टेम्पोने पाठीमागून धडक दिली. या अपघातात पिकअपच्या मागे थांबलेल्या चालकाचा जागीच मृत्यू, तर पिकअपमधील १९ जण जखमी झाले.

या अपघातातील मृत आणि जखमी हे लातूर जिल्ह्यातील आजनी बु. (ता. शिरूर अनंतपाळ) येथील आहेत. आजनी येथील ठाकूर कुटुंबीय इतर नातेवाईकांसह वास्तूशांतीच्या कार्यक्रमासाठी पिकअप (एमएच २४ एबी ६६२४) या वाहनातून अहमदनगरला जात होते. रस्त्यात ते नंदगोपाल डेअरीजवळ पिकअप रस्त्याच्या बाजूला लावून उतरले होते.

थोड्यावेळाने सर्वांना वाहनात बसवून पिकअप चालक ज्ञानेश्वर पांडुरंग ठाकूर ( ४२) हे मागील बाजूचं फाळकं (पाठीमागील दरवाजा) लावत असताना पाठीमागून भरधाव वेगात आलेल्या टेम्पोने पिकअपला जोरदार धडक दिली. या अपघातात दोन्ही वाहनात चिरडून ज्ञानेश्वर ठाकूर यांचा जागीच मृत्यू झाला. तर पिकअपमधील उर्मिला उद्धव ठाकूर (४०), खंडू बळीराम खाणशेट्टी (४५), मुकेश उद्धव ठाकूर (१२), दैवाशाला ठाकूर (४०), रुख्मिनबाई नामदेव ठाकूर (६०), रुपाली गोविंद ठाकूर (११), रेणुका गोविंद ठाकूर (३९), कलावती बाजी येरांडे (४८), रावसाहेब शिंदे (४४), गजानन बालाजी शिंदे (२७), गंगाधर रामा कोरे (७०), अजय माधव शिंदे (१२), बालाजी मुक्ताराम ठाकूर (३७), कमलबाई ठाकूर (६०), ओंकार ज्ञानेश्वर ठाकूर (१५), मेघा ज्ञानेश्वर ठाकूर (३८), मनुबाई गणशेट्टी (७०), विष्णू ज्ञानेश्वर ठाकूर (१२, सर्व रा. आजनी बु.) आणि अर्चना माधव शिंदे (३५, रा. घनसावरगाव) हे जखमी झाले.

सध्या १२ जखमींवर स्वाराती रुग्णालयात उपचार सुरु असून, एकास लातूरला हलविण्यात आले आहे. अपघाताची माहिती मिळताच बर्दापूर पोलिसांनी घटनास्थळी भेट देऊन जखमींना मदत केली. दरम्यान, अपघातानंतर टेम्पोचालकाने घटनास्थळाहून टेम्पोसह पळ काढला.