भाजप आमदाराची ग्रामसेवकाला शिवीगाळ करतानाची ऑडिओ क्लिप व्हायरल

लातूरः भाजपचे नेते पाशा पटेल यांनी भरसभेत फोनवरून ग्राम सेवकाला अश्लील शिविगाळ करत धमकी दिल्याची ऑडिओ क्लिप सोशल मीडियावर व्हायरल झालीय. या प्रकरणी पाशा पटेल यांचा जाहीर निषेध व्यक्त करत महाराष्ट्र राज्य ग्रामसेवक युनियनने नांदेडच्या वतीने जिल्हाधिकाऱ्यांकडे पाशा पटेल यांच्यावर कारवाई करण्याची मागणी केली आहे.

१७ जानेवारी रोजी शेळगाव येथे भाजप नेते पाशा पटेल यांची बांबू परिषद सायंकाळी पाच वाजता आयोजित करण्यात आली होती. या परिषदेसाठी ग्रामसेवक अमोल जाधव उपस्थित होते मात्र ही परिषद वेळेत सुरू न होता रात्री ९ वाजता सुरू झाली. दरम्यान अमोल जाधव यांची तब्येत खालावल्याने ते परिषद स्थळावरून रात्री ८ वाजता देगलूरकर दवाखान्यात निघून गेले. दरम्यान पाशा पेटल यांचा अमोल जाधव यांना शेळगावच्या सरपंचाच्या फोनवरून फोन आला. ते सभेतून बोलत होते. तसंच, त्यांनी फोनही स्पिकरवर ठेवला होता.

वाचाः कमी शेतीतही लाखोंची कमाई देणारे पिक; हिंगोलीतील तरुणाने साधली प्रगती

फोनवरून पाशा पटेल हे अमोल जाधव यांना परिषदेला उपस्थित राहिले नसल्याच्या कारणावरून अश्लील शिवीगाळ करू लागले. अमोल जाधव यांनी पाशा पटेल यांना नम्रपणे समजावण्याचा प्रयत्न केला. मात्र त्यांनी काही एक ऐकून न घेता अमोल जाधव यांना अश्लील शिवीगाळ करत परिषदेच्या ठिकाणी तात्काळ येण्यास सांगितले, असा आरोप केला जात आहे.

वाचाः आगामी निवडणुकांसाठी MIM चं टार्गेट नांदेड, पक्ष विस्तारासाठी लागले कामाला

नांदेड जिल्ह्यात कोविड १९ नियंत्रण कार्यक्रम सुरू असून जिल्हाधिकाऱ्यांनी १४४ कलम जिल्ह्यात लागू केले असताना पाशा पटेल यांनी बांबू परिषद आयोजित करत जमावबंदीच्या आदेशाचे उल्लंघन केले. शिवाय या परिषदेसाठी ग्रामपंचायतची परवानगी न घेता ही परिषद आयोजित केली आणि परिषदेला बराच उशीर झाल्यानंतरही ग्रामसेवक का उपस्थित राहिले नाही म्हणून ग्रामसेवक अमोल जाधव यांना भरसभेत अर्वाच्च भाषेत शिवीगाळ करत धमकी दिली. त्यामुळे संबंधित ग्रामसेवक अमोल जाधव यांची प्रकृती अधिकच खालावली असून मानसिक स्वास्थ्य बिघडले आहे. या प्रकरणाची जिल्हाधिकाऱ्यांनी दाखल घेऊन पाशा पटेल यांच्यावर कायदेशीर कारवाई करावी अन्यथा तीव्र आंदोलन छेडले जाईल, असा इशारा महाराष्ट्र राज्य ग्रामसेवक युनियनने नांदेडच्या वतीने जिल्हाधिकाऱ्यांना निवेदनाद्वारे दिला आहे.