Mumbai : आठवडाभरात मेट्रो २अ व ७चे १० लाख प्रवासी; 'मुंबई वन' कार्डचे फायदे

मुंबई : मेट्रो २अ व ७ने विस्तारित मार्ग सुरू झाल्यापासून आठवडभरातच १० लाख प्रवासीसंख्येचा टप्पा पार केला आहे. दोन्ही मार्गिका मेट्रो १सह (वर्सोवा-घाटकोपर) संलग्नित झाल्याने प्रवासी याचा मोठ्या संख्येने वापर करीत आहेत.

मेट्रो २अ (अंधेरी पश्चिम ते दहिसर पूर्व) आणि मेट्रो ७ (दहिसर पूर्व ते गुंदवली) या मार्गिकांच्या विस्तारित टप्प्याचे १९ जानेवारीला पंतप्रधान नरेंद्र मोदी यांनी लोकार्पण केले. त्यानंतर ही मार्गिका पूर्ण क्षमतेने सुरू झाली असून दररोज सरासरी दीड लाख प्रवासी या मार्गिकांचा वापर करीत आहेत. त्यामुळेच आठवडाभरातील प्रवासीसंख्या १० लाखांवर गेली आहे. या मार्गिकेचा पहिला टप्पा २ एप्रिल २०२२ रोजी कार्यान्वित झाला होता. तेव्हापासून आत्तापर्यंत १ कोटी ०३ लाख २७० मुंबईकरांनी या सेवेचा लाभ घेतला आहे. मेट्रो मार्ग २अ आणि ७ वर एकूण २२ गाड्यांमार्फत दररोज २४५ फेऱ्या चालवल्या जातात.

मुंबईकरांच्या सुलभ प्रवासासाठी मेट्रोसह अन्य पायाभूत सुविधा उभ्या करणाऱ्या मुंबई महानगर क्षेत्रविकास प्राधिकरणाने (एमएमआरडीए) ‘मुंबई वन‘ हे कार्ड सादर केले आहे. प्रवासादरम्यान आवश्यक असलेल्या सर्व गरजांसाठी हे एक सामान्य मोबिलिटी कार्ड आहे. हे कार्ड प्रवाशांना अखंडपणे प्रवास करण्यास मदत करते. हे कार्ड भारतातील सर्व महानगरांमध्ये आणि मुंबईतील सर्व सार्वजनिक वाहतूक सेवांसाठी वापरले जाऊ शकते. या कार्डचा वापर करून शॉपिंग तसेच मेट्रो, बेस्ट बसची तिकिटे इत्यादी खरेदी करता येतात. मेट्रोच्या तिकीट खिडक्यांवर हे कार्ड उपलब्ध आहे. अशा २० हजार कार्डचे वितरण आत्तापर्यंत झाले आहे. ‘मुंबई वन’ कार्डप्रमाणेच ७५ हजार ७३९ वापरकर्त्यांनी मोबाइल अॅपदेखील डाउनलोड केले आहे. या अॅपद्वारे प्रवासी त्यांच्या ठराविक अंतराच्या तिकिटांसाठी क्यूआर कोड तयार करू शकतात.

‘मुंबई वन’ कार्डचे फायदे

- प्रत्येक सहलीवर पाच ते १० टक्के सवलत

- सोमवार ते शनिवार पाच टक्के सवलत

- रविवार व राष्ट्रीय सुट्ट्यांच्या दिवशी १० टक्के सवलत

मुख्यमंत्र्यांकडून प्रशंसा

मेट्रो मार्गिका सुरू झाल्यापासून आठवडाभरातच १० लाखांचा टप्पा पार केल्याबद्दल मुख्यमंत्री एकनाथ शिंदे यांनी मुंबईकर प्रवाशांचे आभार व्यक्त करीत एमएमआरडीएची प्रशंसा केली. ‘एका जागतिक दर्जाच्या प्रवासीसेवेला मिळालेली ही पावती आहे. यापुढेही मुंबईकरांना गतिमान सेवा देण्यासाठी मेट्रोचे जाळे विणले जात आहे’, असे त्यांनी ट्विटर संदेशात म्हटले आहे.