म. टा. खास प्रतिनिधी, मुंबई
बेस्टमधील करोनाबाधित कर्मचाऱ्यांची संख्या दिवसेंदिवस वाढत आहे. मंगळवारी करोनाबाधित कामगारांची संख्या नऊने वाढून १३७वर पोहोचली. तर आत्तापर्यंत मृत कामगारांची संख्या आठ इतकी झाली आहे.
बेस्टकडून अत्यावश्यक सेवेतील कर्मचाऱ्यांना दैनंदिन वाहतूक पुरविली जाते. या विशेष फेऱ्या चालविताना बेस्टच्या चालक, कंडक्टरना करोनाची बाधा होत आहे. अत्यावश्यक सेवेतील कामगारांची संख्या आणि फेऱ्यांची संख्या विषम आहे. त्यामुळेच बससेवांमध्ये सुरक्षित वावर राखणे अशक्य होत आहे. बस चुकल्यास ड्युटीवर पोहोचता येणार नसल्याने कर्मचारी नियमांची पायमल्ली करीत बसमध्ये गर्दी करीत आहेत. यामुळे बेस्ट कामगारांमध्येही संसर्ग बळावत आहे. त्यात अद्याप या कामगारांना आरोग्य विम्याचा लाभ देण्यात आलेला नाही.
६४ कामगार करोनामुक्त
बेस्टमध्ये मंगळवारपर्यंत ६४ कामगार पूर्ण बरे झाले असून, त्यांना रुग्णालयातून घरी सोडण्यात आले आहे. त्यातील काही कामगारांना मधुमेह आणि इतर आजार असूनही त्यांनी करोनावर मात केली आहे.