मुंबईतील रेल्वे प्रकल्पांसाठी १,४६४ कोटी

म. टा. खास प्रतिनिधी, मुंबई

मुंबईतील वेगवेगळ्या रेल्वे प्रकल्पांसाठी रेल्वे मंत्रालय, राज्य सरकार आणि मुंबई रेल्वे विकास महामंडळामध्ये (एमआरव्हीसी) नुकताच सामंजस्य करार करण्यात आला. २०१८-१९मध्ये मुंबईतील विविध रेल्वे प्रकल्पांसाठी १,४६४ कोटी रुपयांच्या प्रकल्पांसाठी करार करण्यात आला आहे.

मुंबईतील रेल्वे प्रकल्पांमध्ये यंदाच्या वर्षात मध्य, हार्बर आणि पश्चिम रेल्वेवर २० पादचारी पूल बांधण्यात येणार आहे. त्यासह चार नवीन प्लॅटफॉर्मही बांधले जाणार आहेत. त्यात १७ किमीचे रूळ, ओव्हरहेड वायर उभारणे आदींचा समावेश आहे. या करारानंतर एमयूटीपी-३ आणि ३-ए प्रकल्पातील शेकडो कोटी रुपयांच्या प्रकल्पांविषयी सामंजस्य करारही सप्टेंबरपर्यंत पूर्ण होईल, असाही दावा केला जात आहे. एमयूटीपी-३, ३-ए प्रकल्पांमुळे मुंबईतील वेगवेगळ्या प्रकल्पांना खऱ्या अर्थाने वेग मिळणार आहे. हा करार पूर्ण झाला की, त्यासंदर्भातील कामांचा आराखडा निश्चित केला जाणार आहे.